بە 14ملیار و 200 ملیۆن دینار  ژمارەیەک پڕۆژەی خزمەتگوزاریی لەسنوورەکانی مەخموور وقووشتەپە دەکرێن

پارێزگای هەولێر ئاشکرای دەکات، بە بە 14ملیار و 200 ملیۆن دینار  چەند پرۆژەیەکی خزمەتگوزاریی لە لەسنوورەکانی مەخموور وقووشتەپە لە سێکتەری ئاو و كاره‌با و ڕێگه‌و بان و قوتابخانه‌ و بنكه‌ی ته‌ندروستیی دەکرێن.

یه‌كشەممە 11ـی ئابی 2024  بەسەرپەرشتی  ئومێد خۆشناو پارێزگارى هەولێر و  سه‌نگه‌ر كانه‌بی  بەرپرسی لقی23ـی قه‌ره‌چووغی پارتی دیموکراتی کوردستان کۆبوونەوەیەکی فراوان لە بارەگای لقی 23ی قه‌ره‌چووغی پارتی دیموکراتی کوردستان  بەڕێوەچوو.

بەپێی ڕاگەیەندراوی پارێزگا، لە کۆبوونەوەکەدا پارێزگاری هه‌ولێر گوژمەی 14  ملیار و 200 ملیۆن دیناری بۆ ئەنجامدانی چەندین پڕۆژەی ئاوه‌دانی له‌ سێكته‌ره‌كانی ئاو و كاره‌با و رێگه‌و بان و قوتابخانه‌ و بنكه‌ی ته‌ندروستیی لە سنووری قەزاکانی مه‌خموور و  قووشتەپە و ناحییەکانی سەر بەو دوو قەزایە، له‌سه‌ر بودجه‌ی په‌ره‌پێدانی پارێزگا ڕاگەیاند و له‌ ئاینده‌یه‌كی نزیكدا ده‌ست بە جێبەجێکردنیان ده‌كرێت.

 له‌لایه‌ن خۆیه‌وه‌ سەنگەر کانەبی بەرپرسی لقی23ـی قه‌ره‌چووغی پارتی دیموكراتی كوردستان خۆشحاڵی خۆی بە تەرخانکردنی ئه‌و گوژمه‌ بۆ سنووری لقی23ی قەرەچووغ نیشاندا و داوایكرد، هه‌ماهه‌نگییه‌كان لەپێناو خزمەتگەیاندنی هاووڵاتییان به‌رده‌وام بن.

هەروەها لەکۆبوونەوەکەدا جەخت لە ئاسانکاری زیاتری ڕاییکردنی کاروباری هاووڵاتییان و پرسەکانی کەمکردنەوەی ڕۆتین و رێزگرتنی زیاترلەهاووڵاتییان کرایەوە کە کابینەی نۆیەمی حکوومەتی هەرێمی کوردستان و خودی سەرۆکوەزیران مەسرور بارزانی جەختی لەسەر دەکاتەوە.

بڕیاری سەرۆکوەزیران مەسرور بارزانی لەبارەی زەوییە سندووقییەکان تەوەرێکی دیکەی کۆبوونەوەکە بوو کە خزمەتی زیاتر بە چینی هەژاران و کەمدەرامەتان و کەمکردنەوەی گرفتی نیشتەجێبوون دەکات.

دواتر بەشێک لە پلان و بەرنامەکانى پارێزگاى هەولێرى بۆ ساڵى 2024، لە چوارچێوەی پڕۆژەکانى پەرەپێدان بۆ ئامادەبووان لەلایەن جێگری پارێزگاری هەولێر خرایەڕوو.