بەرەی مقاوەمەی عێراق بۆ پابەندبوون بە ڕێککەوتنی کشانەوەی هێزەکانی هاوپەیمانان مەرجی هەیە

دەستەی هەماهەنگی مقاوەمەی عێراق ڕایگەیاند، ئەمەریکا لە کشانەوەی هێزەکانی لە عێراق "ڕاستگۆ نییە" و بەریتانیاش دەڵێت، بەردەوام دەبین لە پاڵپشتیکردنی ئاسایش و بەرگری عێراق و هێزی پێشمەرگە.

دەستەی هەماهەنگی مقاوەمەی عێراق، لە ڕاگەیەندراوێکدا ئەوەی ئاشکرا کرد، پرسی کشانەوەی سەرجەم هێزە بیانییەکان لە عێراق، بە هێزەکانی ئەمەریکاشەوە، یەکێکە لەو ئامانجە گرنگانەی کە دەستەی هەماهەنگی مقاوەمەی عێراقی لەبەرچاوی گرتووە، هەروەها پیاوەکانیشیان قوربانی و گیانیان بۆ سەروەری وڵاتەکە و کەرامەتی گەلەکە داناوە".

لە ڕاگەیاندراوەکەدا ئاماژە بەوەش کراوە، "ئێمە پێشوازیی لەو بڕیارەی حکوومەتی عێراق دەکەین کە هەوڵی دەرکردنی هێزەکانی هاوپەیمانی نێودەوڵەتی دەدات، بەلام پێمان وایە هێزەکانی ئەمەریکا 'ڕاستگۆ نین' چونکە هەوڵ دەدات بۆ بەدەستهێنانی کات، بابەتەکە دوابخات".

دەستەی هەماهەنگی مقاوەمە جەختی لەوە کردەوە، کە ئەو ڕێککەوتنەی دەکرێت، دەبێت بە ڕوونی سێ خاڵی بنەڕەتی لەخۆ بگرێت.

 خاڵی یەکەم، "دەبێت دەرچوونەکە گشتگیر بێت و بەپێی ئەو خشتە کاتییەی کە ڕێککەوتنی لەسەر کراوە."

خاڵی دووەم، "نابێت ئۆپەراسیۆنەکانیان لە سووریا لە ناو خاکی عێراقەوە بکەن، چونکە پێچەوانەی دەستووری عێراق و پەیوەندیی دراوسێیەتی نێوان عێراق و سووریایە".

خاڵی سێیەم، "پارێزبەندی بە هێزە سەربازییە بیانییەکان نەدرێت، لە ژێر هەر ناوێکدا بن".

دەستەکە جەختی لەوە کردەوە کە "جگە لەوانەی باس کراون، ئێمە پابەندی هیچ ڕێککەوتنێک نابین".

لەوبارەوە بەرپرسێکی ئەمەریکا ڕایگەیاندووە، ئەمەریکا و عێراق گەیشتتونەتە ڕێککەوتنێک کە بەدوو قۆناغ دەکرێت.

ئاماژەی بەوەش کرد، قۆناغی یەکەم، ماوەی مانەوەی سەربازانی هاوپەیمانی نێودەوڵەتی تاوەکو ئەیلوولی 2025 درێژ بکرێتەوە، گوتیشی: قۆناغی دووەم، تا مانگی ئەیلولی 2026 بەردەوام دەبێت، هەروەها تیشک دەخاتە سەر بەردەوامبوونی کارەکان بۆ دڵنیابوون لەوەی مەترسییەکانی داعش لە باکووری ڕۆژهەڵاتی سووریاوە نەگەڕێتەوە.

ئەو بەرپرسەی ئەمەریکا جەختی کردەوە "واشنتۆن و بەغدا گەیشتوونەتە لێکگەیشتنێک کە ڕێگە بە هاوپەیمانییەکە دەدات کە لانیکەم تا مانگی ئەیلوولی 2026 بەردەوام بێت، لە پشتیوانیی ئۆپەراسیۆنەکانی دژی داعش لە سووریا. ئەمەش بەپێی مەرجەکان و ڕاوێژکاری سیاسی نێوان هەردوو وڵات.

ئەمەریکا 2500 سەربازی لە عێراق و 900 سەربازیشی لە سووریا هەیە، کە لە چوارچێوەی هاوپەیمانی نێودەوڵەتی بۆ ڕووبەڕووبونەوەی داعشە، هەروەها داعش سێ یەکی خاکی عێراق و سووریای داگیر کرد، دواتر لە کۆتایی ساڵی 2017 لە عێراق و لە 2019 لە سووریا کۆتایی بە داعش هێنرا.

هەڵوێستی وەزارەتی بەرگریی بەریتانیا لەسەر مانەوەی هێزەکانی و ئەرکی داهاتوویان لە عێراق

وەزارەتی بەرگریی بەریتانیا لە بەیاننامەیەکدا ڕایگەیاند "بەریتانیا بەردەوام دەبێت لە پاڵپشتیی ئاسایشی عێراق، لەگەڵ ئەوەی هاوپەیمانی نێودەوڵەتی دەچێتە قۆناغێکی نوێوە، بەریتانیاش لە نزیکەوە لەگەڵ هاوبەشە عێراقییەکان کاردەکات بۆ پەرەپێدان بە پەیوەندیی بەردەوامی دوو قۆڵی وەک بەشێک لە پاڵپشتیکردنی ئاسایش و بەرگری نوێ لەگەڵ عێراق.

وەزارەتی بەرگریی بەریتانیا ڕاشیگەیاند "لە ماوەی دەیەی ڕابردوودا، بەریتانیا لە ڕێگەی ئۆپەراسیۆنی 'شادەر'ەوە ڕۆڵێکی پێشەنگی گێڕاوە".

باسی لەوەش کردووە "لەسەر بانگهێشتی حکوومەتی عێراق، هێزەکانی بەریتانیا مەشق و ڕاهێنان و هاوکاریی پێشکەشی زیاتر بە 111 هەزار ئەندامی هێزەکانی عێراق و زیاتر لە 21 هەزار پێشمەرگە کردووە، کە وەک کارامەیی سەرەتایی پیادە، چاککردنەوەی چەک، بەرەنگاربوونەوەی بۆمبی چێندراو، کارامەیی پزیشکی و ئەندازیاری".

ئاماژەی بەوەش کرد "هێزی ئاسمانی بەریتیانیا زیاتر لە 10 هەزار هێرشی ئاسمانی کردووە، زیاتر لە هەزار و 400 ئامانجیشی پێکاوە، ئەمە جگە لە دابینکردنی چاودێری و سیخوڕییەکی ورد بۆ پاڵپشتیکردنی ئۆپەراسیۆنەکانی هێزە عێراقییەکان".

ڕوونیشیکردەوە "بەهۆی بوێری و کاریگەریی هێزە ئەمنییەکانی عێراق و هێزی پێشمەرگە و پابەندبوونی بەردەوامی هاوپەیمانان، داعش لە عێراق شکستی هێناوە، هەروەها هێزە ئەمنییەکانی عێراق توانیویانە خزمەتگوزارییە سەرەتاییەکان بۆ پێکهاتەکان بگەڕێننەوە و ناوچە زیانلێکەوتووەکان نۆژەن بکەنەوە".

ئاماژەی بەوەش کرد "پابەندین بە ئاسایشی عێراق و ناوچەکە، هەوڵ دەدەین پەرە بە پەیوەندییە دووقۆڵیەکان بدەین کە پشتگیریی لە سەقامگیریی درێژخایەن لە عێراق دەکات".