به‌ وێنه‌.. ئه‌و منداڵه‌ عێراقییه‌ی دوو ده‌ست و دوو قاچی زیاده‌ی هه‌بوو نه‌شته‌رگه‌رییه‌كه‌ی سه‌ریگرت

K24 - هه‌ولێر:

منداڵێكی عێراقی له‌ كاتی له‌ دایكبوونیدا له‌ جێگه‌ی ئه‌وه‌ی وه‌ك هه‌ر منداڵێكی ئاسایی دوو ده‌ست و دوو قاچی هه‌بێت، ئه‌و چوار ده‌ست و چوار قاچی هه‌بووه‌، دوای ئه‌وه‌ی له‌ وڵاتی هیندستان چه‌ند نه‌شته‌رگه‌رییه‌كی بۆ لابردنی ئه‌و به‌شه‌ زیادانه‌ی جه‌سته‌ی بۆكراوه‌ كه‌ به‌ سكیه‌وه‌ نووسابوو، سه‌ره‌نجام نه‌شته‌رگه‌رییه‌كه‌ی سه‌كه‌وتوو بوو و پزیشكه‌كان توانییان له‌و كێشه‌ گه‌وره‌یه‌ رزگاری بكه‌ن.

حاڵه‌ته‌ی ئه‌و منداڵه‌ عێراقییه‌ زۆر ده‌گمه‌نه‌ ، ئه‌و ناوی "كه‌ره‌م"ـه‌ و ته‌مه‌نی 7 مانگانه‌، ته‌نها 5 تا 6 حاڵه‌تی وه‌كو ئه‌و له‌ هه‌موو جیهاندا تۆماركراوه‌.

پزیشكه‌كان هۆكاری دروستبوونی حاڵه‌ته‌كه‌ ده‌گه‌ڕێننه‌وه‌ بۆ ئه‌و كاتانه‌ی كۆرپه‌له‌كه‌ له‌ ناو ره‌حمی دایكدایه‌ و ده‌ڵێن" له‌وێدا به‌هۆی پێكه‌وه‌ نووسان رووده‌دات".

سه‌ره‌نجام باوكی منداڵه‌كه‌ی ده‌باته‌ نه‌خۆشخانه‌یه‌كی نزیك شاری نیودلهی پایته‌ختی هیندستان و پزیشكه‌كانیش 3 نه‌شته‌رگه‌ری بۆ ئه‌و به‌شه‌ زیادانه‌ی ده‌ره‌وه‌ی جه‌سته‌ی منداڵه‌كه‌ ده‌كه‌ن و له‌و كێشه‌یه‌ رزگار ده‌بێت.

گوروف راتوور، یه‌كێك له‌ ئه‌ندامانی ئه‌و تیمه‌ پزیشكییه‌ی به‌شداریی نه‌شته‌رگه‌رییه‌كانی كردووه‌ ده‌ڵێت" كاتێك منداڵه‌كه‌یان هێنا ته‌مه‌نی ته‌نها 2 مانگ بوو، حاڵه‌ته‌كه‌شی زۆر ده‌گمه‌ن بوو، پزیشكه‌كانی نه‌خۆشخانه‌ی جایبی، یه‌كه‌مجار توانیان دوو قاچه‌ زیاده‌كه‌ له‌ سكی بكه‌نه‌وه‌، دوای ئه‌وه‌ش به‌ نه‌شته‌رگه‌ری دیكه‌ ئه‌و به‌شه‌ زیاده‌كانیشیان بۆ لادا.