ژماره‌يه‌ك سيناتۆرى ئه‌مريكا داوا له عه‌بادى ده‌كه‌ن هێرشه‌كانى بۆ سه‌ر كوردستان رابگرێت
داواش ده‌كه‌ن دانووستانه‌كانی له‌گه‌ڵ هه‌ولێر ده‌ستپێبكاته‌وه
K24 – هه‌ولێر:
ژماره‌یه‌ك سیناتۆری ئه‌مریكی داوا له سه‌رۆك وه‌زيرانى عێراق حه‌يده‌ر عه‌بادی ده‌كه‌ن هێرشه‌كانی بۆ سه‌ر هه‌رێمی كوردستان رابگرێت و دانووستانه‌كانی له‌گه‌ڵ هه‌ولێر ده‌ستپێبكاته‌وه.
هه‌شت سیناتۆری ئه‌مریكی كه له‌نێویان ماڕكۆ رۆبیۆ كاندیدی پێشووی كۆمارییه‌كان بۆ پۆستی سه‌رۆكایه‌تی ئه‌مریكا و تیم كه‌ین كاندیدی پێشوووی دیموكراته‌كان بۆ پۆستی جێگری سه‌رۆكی ئه‌مریكا له نامه‌یه‌كدا بۆ حه‌یده‌ی عه‌بادی سه‌رۆك وه‌زیرانی عێراق داوای لێده‌كه‌ن كه سزاكانی دژی هه‌رێمی كوردستان رابگرێـت و كۆتاییش به پێكدادانه سه‌ربازییه‌كانی له دژی هێزی پێشمه‌رگه رابگرێت.
پاشان ئه‌و سیناتۆره ئه‌مریكیانه داواشیان له سه‌رۆك وه‌زیرانی عێراق كرد كه چه‌كدارانی حه‌شدی شه‌عبی له ناوچه‌كانی ده‌ره‌وه‌ی ئیداره‌ی هه‌رێمی كوردستان بكشێنێته‌وه و كۆنتڕۆڵی ئه‌و ناوچانه نه‌كه‌ن.
هه‌روه‌ها ئه‌و ژماره‌ی سیناتۆره ئه‌مریكییه له نامه‌كه‌یاندا بۆ عه‌بادی دووپاتی ده‌كه‌نه‌وه كه په‌یوه‌ندییه‌كی به‌هێزی نێوان هه‌رێمی كوردستان و عێراق ده‌بێته هۆی سه‌ركه‌وتن به‌سه‌ر هه‌موو ئه‌و هه‌ڕه‌شانه‌ی رووبه‌ڕو‌وی عێراقێكی فیدڕاڵ و سه‌قامگیر ده‌بێته‌وه.
