كۆمسیۆن بۆ دیاركردنی رۆژی ھەڵبژاردنەكان چاوەڕێی حكومەتە

K24 - ھەولێر

گوتەبێژی  كۆمسیۆنی باڵای هه‌ڵبژاردن و راپرسی هه‌رێمی كوردستان رایدەگەیەنێت، بۆ دیاریکردنی رۆژی هەڵبژاردنەكانی كوردستان، چاوەڕێی كۆبوونەوەن لەگەڵ ئەنجوومەنی وەزیران و پەرلەمان.

شێروان زرار، گوتەبێژی  كۆمسیۆنی باڵای هه‌ڵبژاردن و راپرسی هه‌رێمی كوردستان بە كوردستان24 گوت: "لە دوا كۆبوونەوەماندا لەگەڵ سەرۆكایەتی ئەنجوومەنی وەزیرانی ھەرێم، بڕیاردرا كە ئەنجوومەنی وەزیران و پەرلەمان و كۆمیسۆن كۆببنەوە، ئێمە تا ئێستاش چاوەڕێی ئەوان دەكەین".

 گوتیشی: "بەگوێرەی یاسای ژمارە 4 پەرلەمانی کوردستان، کۆمسیۆنی باڵای هەڵبژاردنەکانی عێراق مافی سەرپەرشتیکردنی هەڵبژاردنەکانی هەرێمی کوردستانی نییە".

 ئاماژەی بەوەشدا: "زۆربەی کارەکانی کۆمسیۆن بۆ بەڕێوەبردنی هەڵبژاردنەکان تەواوبووە و داواكاریمان بۆ دابین كردنی پێداویستییەكانی ھەڵبژاردن پێشكەش بە ئەنجوومەنی وەزیران كردووە".