نه‌تانیاهۆ: مه‌ترسی سه‌ر ئیسرائیل "ئێران، ئێران، ئێرانه‌"

K24 - هه‌ولێر:

بنیامین نه‌تانیاهۆ، سه‌رۆكوه‌زیرانی ئیسرائیل ده‌ڵێت: "ئێران ده‌یه‌وێت ئیمپراتۆرییه‌تێك له‌ رۆژهه‌ڵاتی ناوه‌ڕاست درووست بكات بۆ ئه‌وه‌ی هه‌ژموونی خۆی به‌سه‌ر جیهاندا بسه‌پێنێ.

له‌ دیدارێكی كه‌ناڵی "Fox News"ـی ئه‌مریكی گوتوویه‌تی: "لێره‌وه‌ ئه‌و پرسه‌ ئاشكرا ده‌كه‌م، سێ گرفتمان هه‌یه‌ و زۆرترین مه‌ترسییان بۆ سه‌ر ئیسرائیل هه‌یه‌، ئه‌وانیش، ئێران و ئێران و ئیرانن".

سه‌رۆكوه‌زیرانی ئیسرائیل ئاماژه‌ی به‌وه‌كردووه‌، له‌ ماوه‌ی رابردوودا و له‌كاتی گفتوگۆكردن له‌گه‌ڵ دۆناڵد تره‌مپ سه‌رۆكی ئه‌مریكا، باسی مه‌ترسییه‌كانی "ئێران، ئێران و ئێران"ـم كردووه‌.

له‌ لێدوانێكی نوێدا ده‌رباره‌ی ئێران رایگه‌یاندووه‌: "ئیران هه‌وڵی درووستكردنی ئیمپراتۆرییه‌تێكی شه‌ڕانگێز له‌ رۆژهه‌ڵاتی ناوه‌ڕاست ده‌دات و سه‌ركرده‌كانی ئێران گه‌له‌كه‌یان داده‌پڵۆسن و هه‌وڵی ئه‌وه‌ ده‌ده‌ن كۆنترۆڵی ئه‌و به‌شه‌ی دیكه‌ی رۆژهه‌ڵاتی ناوه‌ڕاست بكه‌ن و ئامانجیان ئه‌وه‌یه‌ هه‌ژموونی خۆیان به‌سه‌ر هه‌موو جیهاندا بسه‌پێنن".

نه‌تانیاهۆ ئێران به‌ پاڵپشتیكاری تیرۆری جیهان ناو ده‌بات كه‌ له‌ هه‌وڵدایه‌ په‌ره‌ به‌ چه‌كی ناوكی بدات و پێیوایه‌ ده‌بێت رێگه‌ی لێبگیرێت.