ڕێکخراوی ئەربیل ماڕاسۆن بەشداری لە ماڕاسۆنی ڕۆتردامی کرد

ڕێکخراوی ئەربیل ماڕاسۆن بەشداری لە ماڕاسۆنی ڕۆتردامی کرد و لەلایەن پارێزگای ئەو شارە پێشوازیان لێکرا.

بە بەشداری 40 هەزار کەس لە شاری ڕۆتردامی هۆڵەندا، ماڕاسۆنی ڕۆتردام بەڕێوەچوو، شاندێکی ڕێکخراوی ئەربیل ماڕاسۆنیش بەشداریکرد و لەلایەن پارێزگای ئەو شارەیش پێشوازیان لێکرا.

دەربارەی ماڕاسۆنی ڕۆتردامیش (ئەلاین میژار) یەکێک لە ڕێکخەرانی ماڕاسۆنەکەیه‌ به‌ كوردستان24ـی راگه‌یاند: "زیاتر لە 40 هەزار کەس لە 126 وڵاتی جیهان بەشداری ماڕاسۆنەکەیان کرد و یەک ملیۆن کەس بۆ سەیرکردنی ماڕاسۆنەکە ئامادەبوون، ئەلاین خۆشحاڵی خۆیشی بە بەشداریکردنی شاندی ڕێکخراوی ئەربیل ماڕاسۆنیش دەربڕی.

لەسەر ئاستی کوڕان و کچانیش ڕاکەرانی وڵاتی کینیا لە پلەکانی یەکەم و دووەم هاتن.

دواتر شاندی ڕێکخراوی ئەربیل ماڕاسۆن لەلایەن پارێزگای شاری ڕۆتردام (ئەحمەد ئەبوو تاڵب) کە بە ڕەگەز عەرەبە پێشوازیان لێکرا و خۆشحاڵی خۆیشی بە ئامادەبوونیان لە ماڕاسۆنی ڕۆتردم دەربڕی و ئەنجامدانی ماڕاسۆنی نێودەوڵەتی هەولێریشی بە کارێکی باش زانی.

بۆ زانین ڕێکخراوی ئەربیل ماڕاسۆن بۆ ماوەی 3 ڕۆژ بەشداریکرد لە پێشانگا و ماڕاسۆنی هەردوو شاری ڕۆتردام و ڕۆما کرد، ئامانجی سەرکیش بریتی بوو لە بانگهێشت کردنی ڕاکەرانی بیانی و خەڵکانی جۆراو جۆر بۆ ماڕاسۆنی نێودەوڵەتی هەولێر کە لە مانگی 10ـی ئەمساڵ بەڕێوە دەچێت، هەروەها وەرگرتنی ئەزموونی زیاتر لە ماڕاسۆنی وڵاتانی تر و جێبەجکردنی لە ماڕاسۆنی هەولێر.