يه‌كێتى دژى بڕيار و رێنماييه‌كانى كۆميسيۆن هاته‌ ده‌نگ

K24 – هه‌ولێر:

يه‌كێتى نيشتمانى كوردستان دژى ئه‌و بڕيار و رێنماييانه‌ى كۆميسيۆنى باڵاى هه‌ڵبژاردن و راپرسى هاته‌ ده‌نگ كه‌ ئه‌مشه‌و ده‌ريكردوون.

له‌ كۆنگره‌يه‌كى رۆژنامه‌وانيدا، راوێژكارى مه‌كته‌بى سياسى يه‌كێتى، سمكۆ ئه‌سعه‌د رايگه‌ياند، ئێمه‌ دژى ئه‌و رێنمايى و بڕيارانه‌ين.

گوتيشى: كۆميسيۆن ده‌زانێت ماوه‌ى تانه‌ لێدان نه‌ماوه‌، بۆيه‌ به‌ره‌به‌رى ده‌ستپێكى پرۆسه‌ى هه‌ڵبژاردن بڕيارى نوێ ده‌رده‌كات.

هه‌روه‌ها گوتى: پێويسته‌ كۆميسيۆن ئه‌و رێنمايى و بڕيارانه‌ى رابگرێت و به‌يانى له‌ كاتى ده‌نگداندا جێبه‌جێيان نه‌كات.

ئه‌مشه‌و كۆميسيۆن ژماره‌يه‌ك بڕيار و رێنمايى نوێى بڵاوكرده‌وه‌.

يه‌كێك له‌ بڕياره‌كان، يه‌كلاكردنه‌وه‌ و په‌سندكردنى ئه‌نجامه‌كان به‌ ده‌نگى دوو له‌سه‌ر سێى كۆميسياران ده‌بێت، له‌ كاتێكدا پێشتر به‌ ده‌نگى په‌نجا زائيد يه‌ك بووه‌. ئه‌مه‌ش يه‌كێك بوو له‌و خاڵانه‌ى مه‌كته‌بى سياسى يه‌كێتى دژى بوو.