حه‌وته‌مین ماراسۆنی نێوده‌وڵه‌تی هه‌ولێر ده‌ستی پێكرد

به‌ره‌به‌یانی ئه‌مڕۆ حەوتەمین ماراسۆنی نێودەوڵەتی هەولێر بە بەشداریی هەزاران کەس به‌ سپۆنسه‌ری میدیایی کوردستان24 ده‌ستی پێكرد، به‌هۆی ماراسۆنەكه‌ش به‌شێوه‌یه‌كی كاتی و بۆ چه‌ند كاتژمێرێك سایدێكی شه‌قامی 60 مه‌تری داده‌خرێت.

ماراسۆنی نێودەوڵەتی هەولێر لە ژێر درووشمی (ئاشتی و ئارامی و ئاوەدانی) لە هەولێر بە بەشداریی هەزاران کەس بەڕێوە دەچێت و دەیان راکەری بیانی بەشدارییان له‌ ماراسۆنە كردووه‌، کە حەوتەمین ساڵە لە کوردستان دەکرێت.

ماراسۆنەکە لە سێ پێشبڕکێ پێکدێت، پێشبڕکێی 42 کیلۆمەتری لە شەقامی 60 مەتری ئەنجام دەدرێت و له‌ كاتژمێر 8:00ـی به‌ربه‌یانی ئه‌مڕۆ ده‌ستی پێكرد، دوو پێشبڕکێی دیکەش لە دەوری پارکی سامی عەبدولڕەحمان بە 12 کیلۆمەتری و 4 کیلۆمەتری بەڕێوە دەچێت.

خاوەنی پلەکانی یەکەم و دووەم و سێیەمی پێشبڕکێی 42 کیلۆمەتری و 12 کیلۆمەتری خەڵاتی تایبەتیان پێدەدرێت و بڕێک پارە وەردەگرن.