هاوسەرۆکی پەیەدە: تورکیا هەوڵی پاراستنی داعش دەدات

K24 – هه‌ولێر:

ھاوسەرۆكی پەیەدە پێیوایە، ھێرشەكانی توركیا چارەسەركردنی قەیرانی سووریا دەكاتە ئامانج و مەبەستی تورکیا مانەوەی داعشە.

شاھۆز حەسەن، ھاوسەرۆكی پارتی یەكێتی دیموكرات (پەیەدە) رایگەیاند: "ھێرشەكانی توركیا بۆ سەر ناوچەكانی گرێ سپی و كۆبانی، بۆ پاراستن و مانەوەی داعشە"

گوتیشی: "ئەگەر سنوورێك بۆ ئەو ھێرشانە دانەنرێت، ئەوا رەوشی سووریا خراپتر دەبێت".

شاھۆز حەسەن ھێرشەكانی توركیا بە پێشێلكردنی یاسا نێودەوڵەتیەكان دەزانێت و دەڵێت: "ھەوڵەكان بۆ چارەسەركردنی قەیرانی سووریا دەكاتە ئامانج، بۆیە دەبێت سنوورێك بۆ ئەو ھێرشانە دابنرێت".

لەماوەی چەند رۆژی رابردوو، سوپای تورکیا بۆردومانی چەند ناوچەیەکی نزیک لە شاری کۆبانێی رۆژئاوای کوردستان کردووە و بەهۆیەوە چەند شەرڤانێک و هاووڵاتی مەدەنی کە یەکێکیان کچێکی منداڵ بوو بوونەتە قوربانی، ئەمەش جیا لە برینداربوونی چەند رۆژنامەنووسێک لەو ناوچانە.

ئەم هێرشەی تورکیا لەکاتێکدا، شەڕڤانانی یەپەگە شەڕی داعش دەکەن و شەڕەکەش لە چەند هەفتەی رابردوو، زیاتر خوێناوی بوون.

‌H.J