9 نیشانە دەریدەخەن زیاد لە پێویست ئاو دەخۆیتەوە

K24 – هه‌ولێر:

خواردنەوەی بڕێکی پێویستی ئاو گرنگی زۆری بۆ لەش هەیە و بەسوودە، بەڵام زۆر خواردنەوەی ئاو چەند کێشەیەک بۆ لەشی مرۆڤ دروست دەکات.

کەسێکی پێگەشتووی تەندروست رۆژانە 9 بۆ 13 پەرداخ ئاو دەخواتەوە، بەڵام گەر ئەم 9 نیشانەیەت هەبوو ئەوا تۆ زیاد لە پێویست ئاو دەخۆیتەوە.

1- ئەو کاتەنەشی تینوت نییە، ئاو دەخۆیتەوە

ئەگەر تینوت نەبوو نابێت ئاو بخۆیتەوە چونکە دەبێتە هۆی تێکچوونی هاوسەنگی ئەلیکترۆلیت ( ئەو ماددەیەی کە لە ئاودا دەتوێتەوە و گیراوەیەک پێکدەێنێت تەزووی کارەبا دەگەیەنێت)، بەمەش کاری ئۆرگانەکانی لەش تێکدەچن.

2- رەنگی میزەکەت تەواو روون و سپییە

ئەگەر رەنگی میزەکەت زۆر تۆخ بێت، ئەوا تۆ بڕی پێویست ئاو ناخۆیتەوە، بەڵام گەر رەنگی میز زۆر روون و سپی بێت، مانای وانییە کە کارێکی تەندروست دەکەیت.

ئەگەر رەنگی میز زەردێکی کاڵ هاوشێوەی رەنگی لیمۆ بێت ئەوا تۆ بڕێکی پێویست ئاو دەخۆیتەوە، بە پێچەوانەوە، کەم یان زۆر ئاو دەخۆیتەوە.

3- هەستان لەخەو بۆ میزکردن

رۆژانە 6-7 جار میزکردن ئاساییە، ئەگەر بێ هیچ کێشەیەکی تەندروستی، شەوانە بۆ میزکردن خەبەرت دەبێتەوە، ئەوا تۆ زیاد لە پێویست ئاو دەخۆیتەوە.

4- هەڵئاوسانی قاچ، دەست و لێو

یەکێک لە نیشانەکانی تێکچوونی هاوسەنگی ئەلیکترۆلیک، هەڵئاوسانی قاچ، دەست و لێوە، ئەمەش بەهۆی ئەوەی رێژەی سۆدیۆم لە خوێندا کەم دەکات.

5- سەرئێشە

کەمبوونی سۆدیۆم لە خوێندا کار دەکاتە سەر خانەکانی مێشک، بەجۆرێک مێشک فشار دەخاتە سەر ئێسکی سەر، بەمەش سەر ئێشە دروست دەبێت و لە هەندێک حاڵەتیشدا کەسە زیان بە مێشکی دەگات و دووچاری لەخۆچوون و بێهۆشی دەبێت.

6- هەرگیز بێ بوتڵێک ئاو لە ماڵ ناچیتە دەرەوە

ئەگەر هەمیشە بوڵێک ئاو هاوڕێت بێت، ئەوا مانای ئەوەیە تۆ زۆر ئاو دەخۆیتەوە و بەمەش زیان بە تەندروستیت دەگەیەنیت.

7- تێکچوونی گەدە

ئەگەر بەبێ هۆکار هەستی رشانەوە تیایدا دروست بێت، ئەوا رێژەیەکی زۆر ئاو دەخۆیتەوە.

8- بێ هێزی ماسوولکە

هەر بەهۆی کەمبوونەوەی سۆدیۆم لە لەشتدا، لەرزین و بێ هێزیی لە ماسولکەکانت دروست دەبێت، جیا لەوەش هەست بە ئازاری دەست و قاچ دەکەیت.

گەر ئەو نیشانەت هەیە ئەوا ئەگەری هەیە تۆ بڕێکی زۆر ئاو بخۆیتەوە.

9- هەستکردن بە ماندویی

یەکێک لە هۆکارەکانی خەواڵویی بۆ تێكچوونی هاوسەنگی ئەلیکترۆلیت دەگەڕێتەوە. ئۆڤەرهایدرەیشن (زیادبوونی زۆری رێژەی ئاو لە لەشدا) دەبێتە هۆی ئەوەی کەسەکە هەست بە ماندویی و بێ هێزیی بکات.

سەرچاوە: Business Insider

H.J