ئالێگری: ئاستی كریستیانۆ هه‌رگیز تووشی شۆكی نه‌كردووم
لێدوانه‌كانی ئالێگری له باره‌ی كریستیانۆ به‌خێرایی له میدیاكان بڵاو كرایه‌وه
ماسیملیانۆ ئالێگری راهێنه‌ری یانه‌ی یوڤێنتۆس له دیمانه‌یه‌كی رۆژنامه‌ی ریكۆردی پورتوگالی جه‌خت له‌وه ده‌كاته‌وه كه ئاستی كریستیانۆ له‌م وه‌رزه تووشی شۆكی نه‌كردووه، ده‌شڵێت: من خۆم چاوه‌ڕوانی ئه‌و ئاسته‌به‌رزه‌م له كریستیانۆ ده‌كرد، ئه‌و به باشترین شێوه له نێو یاریگه كاری خۆی ده‌كات و بۆته نموونه‌یه‌كی باڵا بۆ یاریزانه‌كانی دیكه‌ش.
ئالێگری راهێنه‌ری یوڤی ئاماژه بۆ ئه‌وه ده‌كات كه كریستیانۆ رۆژ به رۆژ هه‌وڵی باشتربوون ده‌دات و به باشترین شێوه ده‌یه‌وێت خزمه‌تی تیپه‌كه‌ی بكات، ده‌شڵێت: تۆ كاتێك یاریزانێكی وه‌ك كریستیانۆ رۆناڵدۆ له تیپه‌كه‌تدا بوونی هه‌بێت، بێگوومان به‌رپرسیاریه‌تیت كه‌متر ده‌بێت و ئه‌ركت ئاسانتر ده‌بێت، چونكه یاریزانێكی وه‌ك كریستیانۆ به‌بێ كه‌مترین ماندووبن باشترین رۆڵت بۆ ده‌گێرێت.
ئالێگری گوتیشی: كریستیانۆ له نێو یاریگه سه‌ره‌ڕای ئه‌وه‌ی ئه‌ستێره‌یه‌كی گه‌وره‌یه، به‌ڵام خۆویست نییه و خۆی به گه‌وره نازانێت و بۆته نموونه‌یه‌كی باش بۆ سه‌رجه‌م یاریزانه‌كان.
ئالێگری ده‌شڵێت: ئه‌وه‌ی منی دڵخۆش كردووه كریستیانۆ له‌گه‌ڵ خولی ئیتاڵیا و یانه‌ی یوڤێنتۆس زۆر ئاسووده‌یه، له چامپیۆنزلیگ هیوایه‌كی گه‌وره‌مان پێیه‌تی.
