هه‌ولێر له خولی نایابی عێراق شكستی به یانه‌ی مینا هێنا
هه‌ولێر پێنجه‌مین سه‌ركه‌وتنی له خولی نایابی عێراق تۆمار كرد
له گه‌ڕی پازده‌یه‌می خولی نایابی تۆپی پێی عێراق یانه‌ی هه‌ولێر به گۆڵێكی بێوه‌ڵام شكستی به یانه‌ی مینا هێنا و پێنجه‌مین سه‌ركه‌وتنی له‌م وه‌رزه تۆمار كرد.
ئێواره‌ی ئه‌مڕۆ سێشه‌ممه، 5 شووباتی 2019، له یاریگه‌ی یه‌كه‌می فره‌نسۆ هه‌ریری یانه‌ی هه‌ولێر میوانداریی یانه‌ی مینای شاری به‌سرای كرد.
یارییه‌كه له گێمی یه‌كه‌م به یه‌كسانبوون به‌بێ گۆڵ كۆتایی هات، به‌ڵام له خوله‌كی 74 گۆڵپارێزی یانه‌ی مینا به هه‌ڵه گۆڵێكی له خۆیان تۆمار كرد و یارییه‌كه‌ش تا كۆتایی به گۆڵێكی بێبه‌رامبه‌ر به‌سوودی یانه‌ی هه‌ولێر كۆتایی هات.
یانه‌ی هه‌ولێر رۆژی یه‌كشه‌ممه‌ی داهاتوو له گه‌ڕی شازده‌یه‌می خولی نایابی عێراق بۆ رووبه‌ڕبوونه‌وه‌ی یانه‌ی كه‌رخ رووده‌كاته به‌غدا.
یانه‌ی هه‌ولێر ئه‌م وه‌رزه له كۆی 15 یاری، 5 بردنه‌وه، 4 به‌رامبه‌ربوون و 6 شكستی هه‌یه، 13 گۆڵی تۆمار كردووه و 16 گۆڵی لێكراوه و به كۆكردنه‌وه‌ی 19 خاڵ به‌شێوه‌یه‌كی كاتی بۆ پله‌ی نۆیه‌می ریزبه‌ندی خوله‌كه سه‌ركه‌وت.