سهرۆك بارزانی بۆ كۆتاییهێنان به ئازارەكانی گەلی كورد لە سووریا داوای رۆڵ له رووسیا دهكات
رووسیا بایهخ به پێگهی ههرێمی كوردستان دهدات و سهرۆك بارزانی سوپاسی سهرۆك پوتین دهكات
K24 - ههولێر:
ئهمڕۆ دووشەممە 25/2/2019 سەرۆك مەسعود بارزانی له كاتی پێشوازیكردنی لە مەكسیم مەكسیمۆڤ باڵیۆزی ڕووسیا لە عێراق و شاندی یاوەری. سوپاسی سەرۆك پۆتین و حكوومەتی ڕووسیای كرد و پێزانینی هەبوو بۆ هەڵوێستی سەرۆك و حكوومەتی ڕووسیا لەمەڕ دۆزی ڕەوای گەلی كوردستان لە قۆناغە جیاجیاكاندا، پێشوازیشی لە فراوانتركردن و هاوكاریی نێوان هەرێمی كوردستان و ڕووسیا كردەوە.
لە دیدارەكەدا كە ڤیكتۆر سیماكۆڤ كونسوڵی ڕووسیا لە هەولێریش ئامادەی بوو، باڵیۆزی ڕووسیا لە عێراق سڵاوی سەرۆك پۆتین و وەزیری دەرەوە و نوێنەری تایبەتی سەرۆكی ڕووسیا بۆ كاروباری ڕۆژهەڵاتی ناوەڕاست بە سەرۆك بارزانی گەیاند و جەختی لە بایەخ و پێگەی هەرێمی كوردستان لە سیاسەتی دەرەوەی ڕووسیا و پەرەپێدانی نێوان پەیوەندییەكانی هەردوولا كردەوە.
هەر لەو دیدارەدا بیروڕا لەبارەی بارودۆخی سیاسی و دواپێشهاتەكانی ناوچەكە و سووریا ئاڵوگۆڕ كرا و باڵیۆزی ڕووسیا سیاسەت و ستراتیجیی وڵاتەكەی لەبارەی پێشهات و دوایین گۆڕانكارییەكانی سووریا و هەروەها ڕۆڵی كورد لە ئاییندەی سووریا بە سەرۆك بارزانی ڕاگەیاند.
پەیوەست بەم باسەوە سەرۆك بارزانی نیگەرانی و بۆچوونەكانی خۆی لەبارەی ئاییندەی گەلی كورد لە سووریا و ڕێگەچارەكان خستەڕوو و داوایشی كرد كە ڕووسیا ڕۆڵی هەبێت بۆ ڕێگەگرتن و كۆتایهاتن بە ئێش و ئازارەكانی گەلی كورد لە سووریا. بۆ ئەو مەبەستەیش هەردوولا لەسەر ئەوە هاوڕا بوون كە لە پەیوەندی و ڕاوێژی بەردەوامدا بن.
پەیوەندییەكانی نێوان هەرێم و بەغدا و چارەنووسی كەركووك و هەنگاوەكانی ناو پڕۆسەی سیاسیی هەرێم تەوەری تری ئەو كۆبوونەوەیە بوون.
