لێژنه‌ی یاسایی په‌رله‌مانی كوردستان به‌بێ یه‌كێتی هه‌ڵبژێردرا

K24 - هه‌ولێر:

ئه‌مڕۆ په‌رله‌مانی كوردستان، 9 ئه‌ندامی بۆ لێژنه‌ی یاسایی په‌رله‌مان هه‌ڵبژارد كه‌ له‌ بنه‌ڕه‌تدا 11 ئه‌ندامه‌ و 2 ئه‌ندامی به‌ر یه‌كێتی نیشتمانی كوردستان كه‌وتووه‌، به‌ڵام به‌شداری كۆبوونه‌وه‌كه‌یان نه‌كرد.

لێژنه‌كه‌ به‌ كۆی ده‌نگی په‌رله‌مانتاران، كه‌ 73 ده‌نگی به‌ڵێ بوو په‌سه‌ند كرا، له‌ به‌رامبه‌ریشدا، 6 ده‌نگی نه‌خێر هه‌بوو.

به‌م شێوه‌یه‌ش ئه‌ندامانی لێژنه‌كه‌، به‌مشێوه‌یه‌ به‌سه‌ر فراكسیۆنه‌كاندا دابه‌شكرا، كه‌ 4 ئه‌ندام بۆ فراكسیۆنی پارتی، 1 ئه‌ندامی فراكسیۆنی گۆڕان، 1 ئه‌ندامی فراكسیۆنی كۆمه‌ڵ، 1 ئه‌ندامی فراكسیۆنی گه‌شه‌پێدانی توركمان، 1 ئه‌ندامی فراكسیۆنی نه‌وه‌ی نوێ، 1 ئه‌ندامی كلدانی سریانی ئاشووری (هاوپه‌یمانی یه‌كێتی نه‌ته‌وه‌یی).

ناوی ئه‌ندامانی لێژنه‌ی یاسایی، به‌م جۆره‌یه‌، كه‌ هێشتا دوو ئه‌ندامه‌ی به‌ر فراكسیۆنی یه‌كێتی كه‌وتوون، دیار نییه.

ئه‌رشه‌د حوسێن محه‌مه‌د – فراكسیۆنی پارتی.

بژار خالد – فراكسیۆنی پارتی.

خه‌دیجه‌ عومه‌ر ته‌ها – فراكسیۆنی پارتی.

عه‌بدولسه‌لام عه‌بدوڵڵا حه‌سه‌ن – فراكسیۆنی پارتی.

جه‌لال محه‌مه‌د حه‌مه‌دئه‌مین – فراكسیۆنی گۆڕان.

رووپاك ئه‌حمه‌د ره‌حمان – فراكسیۆنی كۆمه‌ڵ.

رۆبینه‌ ئۆیملك عه‌زیز مه‌ملوك – فراكسیۆنی هاوپەیمانی یەکێتی نەتەوەیی.

سارا دڵشاد ئه‌بوبه‌كر – فراكسیۆنی گه‌شه‌پێدانی توركمان.

كاوه‌ عه‌بدولقادر حه‌سه‌ن – فراكسیۆنی نه‌وه‌ی نوێ.

ھەر لەو چوارچێوەیەدا هێمن هەورامی، جێگری سەرۆکی پەرلەمانی کوردستان رایگەیاند، فراکسیۆنی پارتی دیموکراتی کوردستان و فراکسیۆنی حزبی سۆسیالیست دیموکراتی کوردستان هاوپەیمانێتییەکیان پێکهێناوە و ژمارەی کورسییەکانیان گەیشتووەتە 46 کورسی.

گوتیشی، داوامان لە فراکسیۆنی یەکێتی نیشتمانی کوردستان کردووە، ناوی دوو ئەندامیان بۆ لیژنەی یاسایی رەوانە بکەن، بەڵام تاوەکو ئێستا رەوانەیان نەکردووە. ئاماژەی بەوەشدا، فراکسیۆنی پارتی و سۆسیالیست 4 ئەندام و یەکێتی 2 ئەندام و گۆڕان 1 ئەندامیان لە لیژنەی یاسایی هەیە.

ئ.م