هەسەدە لە راگەیاندنی سەرکەوتنی تەواوەتی نزیک دەبێتەوە

K24 – هه‌ولێر:

هێزەکانی سووریای دیموکرات (هەسەدە) کۆنتڕۆڵکردنی کامپی باغۆز و دەستگیرکردنی سەدان چەکداری داعشی راگەیاند.

لە زنجیرە تویتێکدا، مستەفا بالی، وتەبێژی هەسەدە بڵاویکردووتەوە: " دوای کۆنتڕۆڵکردنی کامپی باغۆز، سەدان چەکداری داعشی بەریندار و نەخۆش دەستگیرکران".

راشیگەیاند: "ئەمە راگەیاندنی سەرکەوتنی تەواوەتی نییە، بەڵام بەرەوپێشچوونی بەرچاومان کردووە. چەکدارانی داعش لە شوێنێکی زۆر بچووک کۆمەڵ بوون".

پێشتر مستەفا بالی، دەستگیرکردنی 157 چەکداری داعشی راگەیاندبوو کە بە گووتەی خۆی، نەخۆش و بریندارەکانیان رەوانەی نەخۆشخانە کراون.

باغۆز دواین پێگەی چەکدارانی داعشە لە سووریا و کۆنتڕۆڵکردنی لە لایەن هەسەدەوە تا دێت نزیکتر دەبێتەوە.

H.J