لیۆنێل مێسی تووشی پێكان بوو

لیۆنێل مێسی كاپتنی هه‌ڵبژارده‌ی ئارجێنتینا له‌ دوایین راهێنانه‌كانی هه‌ڵبژارده‌كه‌ی به‌هۆی‌ پێكانه‌وه‌ یاریگه‌ی جێهێشت، میدیاكانی ئارجێنتیناش پێكانه‌كه‌ به‌سووك وه‌سف ده‌كه‌ن و دڵنیایی ده‌ده‌نه‌ هانده‌ران به‌شداریی یاریی داهاتووی تانگۆ به‌رامبه‌ر ڤێنزویلا ده‌كات.

لیۆنێل مێسی دوای مۆندیالی 2018ـی رووسیا له‌ هه‌ڵبژارده‌ی وڵاته‌كه‌ی دابڕا بوو، 2 رۆژ له‌مه‌وبه‌ر بۆ یه‌كه‌مجار له‌ مه‌درید په‌یوه‌ندی به‌ كه‌مپ و مه‌شقی راهێنانی ئارجێنتینا كرده‌وه‌ و له‌ راهێنانه‌كانی دوێنێی وڵاته‌كه‌ی له‌سه‌ر كۆمه‌ڵگه‌ی وه‌رزشی ڤالدیبیباس كه‌ تایبه‌ته‌ به‌ شوێنی مه‌شقه‌كانی ریال مه‌درید مێسی تووشی پێكان بوو و یاریگه‌ی جێهێشت.

پێگه‌ی ئۆڵێی ئارجێنتینا نووسیویه‌تی: پێكانه‌كه‌ی مێسی سووكه‌ و به‌شداریی یارییه‌ دۆستانه‌كه‌ی داهاتووی تانگۆ به‌رامبه‌ر ڤێنزویلا ده‌كات.

هه‌ڵبژارده‌ی ئارجێنتینا هه‌ینی داهاتوو له‌ كاتژمێر 11:00ـی شه‌و له‌ یاریگه‌ی واندا میترۆبۆلیتانۆی تایبه‌ت به‌ ئاتڵێتیكۆ مه‌درید رووبه‌ڕووی ڤێنزویلا ده‌بێته‌وه‌، پاشان له‌ 26ـی ئه‌م مانگه‌ ده‌بێته‌ میوانی هه‌ڵبژارده‌ی مه‌غریب.

دوای 6 مانگی دیكه‌ لیۆنێل مێسی له‌گه‌ڵ هه‌ڵبژارده‌ی ئارجێنتینا به‌شداریی له‌ كۆپا ئه‌مریكای 2019 ده‌كات.