سلێمانی.. 27 كەس دەستگیر كران

K24 - سلێمانی

پۆلیسی سلێمانی ئاشكرای كرد، 27 تۆمەتبار، كە فەرمانی گرتنیان لە دادگاوە بۆ دەرچووە، له‌ سلێمانی ده‌ستگیر كران.

لە راگەیەندراوێكدا، بەڕێوەبەرایەتیی پۆلیسی پارێزگای سلێمانی ئاشكرای كرد: "تۆمەتبارێك دەستگیر كرا، كە هەستابوو بە تەقەكردن. دوای ئەوەی هێزەكانی بنكەی پۆلیسی راپەڕین زانیارییان پێگەیشت، كە كەسێك لە گەڕەكی تاسڵوجە و لەناو ئۆتۆمبێلەكەیەوە تەقە دەكات، هێزەكانی بنكەی پۆلیسی راپەڕین بازگەیەكیان لە شوێنی مەبەست دانا و توانییان تۆمەتبارەكە دەستگیر بكەن. ئێستا تۆمەتبارەكە بە فەرمانی دادوەر و بەپێی ماددەی 21ی چەك، راگیراوە و دەستیش گیراوە بەسەر چەكی بەكارهاتوودا".

بەپێی راگەیەندراوەكە: "چوار تۆمەتباری دیکە بەپێی ماددەی 405-31 لە یاسای سزادانی عێراقی و 16 تۆمەتباری تریش بەپێی ماددەی 548 لە یاسای زیادەڕەویی، كە زیادەڕەوییان كردووەتە سەر موڵك و ماڵی گشتی، ده‌ستگیر كران. ئه‌مه‌و له‌گه‌ڵ ده‌ستگیركردنی شەش تۆمەتباری دیكه‌ بەپێی چەند ماددەیەك لە یاسای سزادانی عێراقی".

پۆلیسی سلێمانی راشیگەیاندووە: "لەلایەن بنكەی پۆلیسی راپەڕینەوە پەڕاوی لێكۆڵینەوە بۆ سەرجەم تۆمەتباره‌كان كراوەتەوە".

ھ.م