ترهمپ ئامادهیى خۆی بۆ دانوستان لهگهڵ ئێران نیشان دا
ترهمپ: ئێستا ئێران وڵاتێكی لاوازه و دهیهوێت رێككهوتن لهگهڵ ئهمهریكا بكات
.jpg)
K24- ههولێر:
دۆناڵد ترهمپ، سهرۆكی ئهمهریكا دووپاتی كردهوه، ئهگهر تاران بیهوێت، ئهوا واشنتن ئامادهیه بۆ دانوستانكردن.
ئهم قسانهی ترهمپ له میانهی دیدارهكهیدا لهگهڵ شێنزۆ ئابێ، سهرۆك وهزیرانی ژاپۆن هاتوون و ئاماژهی بهوهش دا، "ئێران ئێستا بووهته وڵاتێكی لاواز و دهیهوێت رێككهوتنێك لهگهڵ واشنتن بكات" و جهختیشی كردهوه كه "ئهگهر ئێران بیهوێت گفتوگۆ بكهین، منیش ئامادهم".
لهم بارهیهوه ترهمپ گوتیشی: "دركم بهوه كردووه، كه ئێستا ئێران خواستی بۆ ئهنجامدانی گفتوگۆ ههیه، ئهگهر وابێت، ئێمهش ههمان خواستمان ههیه" و ئاماژهی بهوهش كرد، كه ئهوان چاوهڕێن، تا بزانن چی روو دهدات و دهڵێت: "هیچ كهسێك نایهوێت شتێكی نهخوازراو روو بدات".
ئهمه لهكاتێكدایه كه شهوی رابردوو عهلی خامهنهئی، رێبهری كۆماری ئیسلامیی ئێران ههموو جۆره دانوستانێكی لهگهڵ ئهمهریكا رهتكردهوه.
پێشتریش ترهمپ رایگهیاندبوو، كه ئهو نایهوێت رژێمی ئێران بگۆڕێت، بهڵكوو ههوڵ دهدهن كۆماری ئیسلامی رهفتارهكانی بگۆڕێت و دهست لهو فراوانخوازییه ههڵگرێت، كه له ناوچهكهدا دهیكات، ئهمهش دوای ئهوهی به هۆی كشانهوهی ئهمهریكا له رێككهوتنی ئهتۆمی و سزا نوێیهكانی واشنتن بۆ سهر تاران، گرژیی نێوان ئهمهریكا و ئێران له ناوچهكه گهیشتووهته لوتكه، رۆژانه ههردوو لا هۆشداریی له ئهگهری هێرشكردنه سهر یهكتر دهدهن و ههڕهشه له یهكتر دهكهن.
H.B