هه‌ولێر دوایین ئاماده‌كارییان بۆ یارییه‌ قورسه‌كه‌ی ئه‌م وه‌رزه‌یان كرد

له‌ گه‌ڕی 31ـه‌می خولی نایابی عێراقی، سبه‌ی هه‌ینی هه‌ولێر له‌ شاری به‌غدا ده‌بێته‌ میوانی شورته‌، یارییه‌كه‌ش كاتژمێر 7:30 خوله‌كی ئێواره‌ به‌ڕێوه‌ده‌چێت، ئه‌م یارییه‌ به‌تاقیكردنه‌وه‌ زه‌حه‌مته‌كه‌ی ئه‌كره‌م سه‌لمانی راهێنه‌ری هه‌ولێر داده‌نرێت.

هه‌ولێر له‌ یارییه‌كی به‌هێزدا له‌ دژی شورته‌ی خاوه‌نی پێگه‌ی یه‌كه‌می ریزبه‌ندی خوله‌كه‌ یاریی ده‌كات، هه‌رچه‌نده‌ هه‌ولێر له‌ 3 یاریی رابردوو یه‌كسانێك و دوو بردنه‌وه‌ی به‌ده‌ستهێناوه‌، ئه‌مه‌ش نیشانه‌ی به‌رزبوونه‌وه‌ی ئاستی زه‌ردپۆشه‌كانی هه‌ولێر ده‌رده‌خات له‌سه‌ر ده‌ستی راهێنه‌ره‌ تازه‌كه‌ی، به‌ڵام شورته‌ به‌هێزترین و باشترین ئاستی له‌سه‌رتای خوله‌كه‌وه‌ نیشانداوه‌، ته‌نها یه‌ك یاریی دۆڕاندووه‌، تاكه‌ یانه‌یه‌ به‌ ئاستێكی جێگیر ده‌رده‌كه‌وێت، شورته‌ له‌ سێ یاریی رابردوو دۆڕانێك و دوو بردنه‌وه‌ی هه‌یه‌.

هه‌ولێر له‌ كۆی 30 یاریی رابردوو 10 یاریی براوه‌بووه‌ و 9 یاریی یه‌كسان بووه‌ و 11 دۆڕانیشی هه‌بووه‌، 28 گۆڵیشی تۆمار كردووه‌ و به‌ كۆكردنه‌وه‌ی 39 خاڵ له‌ پله‌ی ده‌یه‌می ریزبه‌ندییه‌كه‌ دێت، محه‌مه‌د جه‌فال له‌ زه‌ردپۆشه‌كان به‌ 9 گۆڵ گۆڵكاری یانه‌كه‌یه‌تی.

شورته‌، له‌ كۆی 30 یاریی 22 بردنه‌وه‌ی هه‌یه‌ و 7 یه‌كسان و یه‌ك دۆڕانی هه‌یه‌، 62 گۆڵی كردووه‌ و 14 گۆڵی لێكراوه‌، شورته‌ به‌ 73 خاڵ له‌ پله‌ی یه‌كه‌می خوله‌مه‌ دێت، عه‌ڵا عه‌بدولزه‌هرا به‌ 25 گۆڵ گۆڵكاری یانه‌كه‌ و خوله‌كه‌شه‌.

له‌كۆی 10 یاریی رابردووی نێوانیان هه‌ولێر 3 یاریی بردۆته‌وه‌ و شورته‌ش له‌ 5 یاریی سه‌ركه‌وتنی به‌ده‌ستهێناوه‌، دوو یاری نێوانیشیان به‌ یه‌كسان بوون ته‌واو بووه‌، به‌ڵام گه‌وره‌ترین ئه‌نجام له‌ به‌رژه‌وه‌ندی هه‌ولێریه‌كان بووه‌ له‌ وه‌رزی 2012، كاتێك به‌ (5-1) له‌ سه‌وزپۆشه‌كانی به‌غدای بردۆته‌وه‌، له‌ یاریی یه‌كه‌می ئه‌م وه‌رزه‌ش هه‌ولێر له‌سه‌ر یاریگای خۆی (4-0) به‌ شورته‌ دۆڕا.