بۆردومانەکانی تورکیا 60 ماڵی لە باڵەكایەتی ئاوارە كرد

K24 - چۆمان

بەهۆی بۆردومانی فڕۆكە جەنگییەكانی توركیا بۆسەر پێگەکانی پەکەکە، نزیکەی 60 ماڵ لە سنووری ناحیەی قەسرێ-ی سەر بە پارێزگای هەولێر ئاوارە بوون.

شاخەوان حوسێن، بەڕێوەبەری ناحیەی قەسرێ بە كوردستان24ی راگەیاند: "شەوی رابردوو فڕۆکەکانی جەنگییەكانی تورکیا بە چڕی پێگەکانی پەکەکەیان لە سنووری ناحیەکەی قەسرێ بۆردومانکردووە و بۆردومانەکەش زیانی زۆری بە رێگاوبان و تۆڕەکانی کارەبا و رەزوباخی ھاووڵاتیان گەیاندووە".

بەڕێوەبەری ناحیەی قەسرێ ئاشکراشی کرد: "بەهۆی بۆردومانەکانی شەوی رابردوو نزیکەی 60 ماڵ لە گوندەكانی سنووری قەسرێ ئاوارە بوون".

روونیشی كردەوە: "نزیكەی 200 ماڵی سنووری ناحیەی قەسرێ بەھۆی بوردومانەكان لەژێر مەترسیدان، بەڵام تائێستا تەنھا 60 ماڵ ناوچە مەترسیدارەكانیان جێھێشتووە".

ھ.م