به‌ وێنه‌.. رێوڕه‌سمی ده‌ستبه‌كاربوونی پارێزگاری نوێی هه‌ولێر ببینه‌

K24 – هه‌ولێر:

ئه‌مڕۆ له‌ دیوانی پارێزگاری هه‌ولێر، به‌ سه‌رپه‌رشتی و ئاماده‌بوونی وه‌زیری ناوخۆی حكومه‌تی هه‌رێم، رێبه‌ر ئه‌حمه‌د، نه‌وزاد هادی پارێزگاری پێشووی هه‌ولێر، ئاڵوگۆڕی له‌گه‌ڵ فرسه‌ت سۆفی پارێزگاری نوێی هه‌ولێر كرد.

بە ئامادەبوونی رێبەر ئەحمەد، وەزیری ناوخۆی حکوومەتی هەرێمی کوردستان، پارێزگاری نوێی هەولێر، فرسەت سۆفی، لە رێوڕەسمێکدا دەستی بەکارەکانی کرد. 

لە سەرەتای رێوڕەسمەکە، وەزیری ناوخۆی حکوومەتی هەرێمی کوردستان رایگەیاند: "کاک نەوزاد وەکو ئەندازیارێک لە هەر شوێنێک کاری کردبێت جێ پەنجەی دیار بووە و هیوادارم لە ئەرکە نوێیەکەی سەرکەوتوو بێت".

راشیگەیاند: "پیرۆزبایی لە د. فرسەت دەکەم، وەکو کادیرێکی ئەکادیمی و ئیداریی هەولێر دەست بەکارەکانی دەکات". 

ئاماژەی بەوەشدا: "فرسەت لە ناو خەڵک هاتووە و دەتوانێت لە ئێش و ئازاری خەڵک تێبگات". 

لای خۆیەوە نەوزاد هادی، پارێزگاری پێشووی هەولێر گووتی: "هیوادارم هەموو یەکە ئیدارییەکان پاڵپشتی تەواوی د. فرسەت سۆفی بکەن کە بە هەستێکی نیشتیمانپەروەرانە کارەکانی دەکات". 

لە رێوڕەسمەکە، فرسەت سۆفی بەڵێنی خزمەتکردنی خەڵکی هەولێری دا و رایگەیاند: "شەو و رۆژ دەخەینە سەر یەک تاکو بتوانین خزمەتی زیاتری خەڵکی ئەم شارە بکەین و داواش دەکەم هەموومان بە یەک تیم کارەکان بکەین چونکە کەسمان بە تەنها هیچ نین". 

دوێنێ دووشەممە 16/09/2019، فرسەت سۆفی لە بەردەم نێچیرڤان بارزانی، سەرۆکی هەرێمی کوردستان و بە ئامادەبوونی رێبەر ئەحمەد، وەزیری ناوخۆی حکوومەتی هەرێمی کوردستان وەک پارێزگاری نوێی هەولێر سوێندی یاسایی خوارد.

فۆتۆ: جه‌مال یاد