پسپۆڕان هۆشداریی دەدەنە ئەو کەسانەی فەرمانبەر و کارمەندن

K24 – هه‌ولێر:

میلۆنەها کەس کە لە ئۆفیسەکان کار دەکەن، مەترسی تەندروستیی گەورەیان لەسەرە و پزیشکان هۆشداریی دەدەن کە دەبێت گۆڕانکاری خێرا بکەن.

پەیکەرێکی دروستکراو، شێوەی لەشی گۆڕاوە بۆ شێوەی کەسێک کە ماوەی 20 ساڵ لە ئۆفیسێک کاردەکات.

ویلیام ویگهام، شارەزای بواری رەفتارزانیی دەڵێت: "دەبێت فەرمانبەران زۆر بە خێرایی بکەونە خۆ و لەسەر ئەمجۆرە کێشەیەی شوێنی کارەکانیان بێنە دەنگ".

دەشڵێت: "ئەو کەسانە رەوشیان لە کرێکارەکانی سەردەمی شۆڕشی پیشەسازی خراپتر دەبێت ئەگەر بەمجۆرە بمێننەوە".

ئەم شارەزایانە باس لەو کەسانە دەکەن، کە لەسەر کۆمپیتەر و کورسی کارەکانیان دەکەن و دەڵێن دوای 20 ساڵ دووچاری چەمانەوەی پشت، گرێی دەماریی، گەورەبوونی گەدە، سووربوون و وشکبوونی چاو، مووی گوێچکە و لووت دەبن.

بەگوێرەی راپرسییەکان، 50%ی کارمەندانی بەریتانیا دووچاری تێکچوونی چاو، 46% دووچاری ئازاری پشت و 48% دووچاری سەر ئێشە بوونەتەوە.

گرێی دەمارەکان ئەو کاتە دروست دەبێت، کاتێک بۆ ماوەیەکی زۆر دادەنیشیت، ئەم گرێیە زۆر بە ئازارە و دەبێتە هۆی هەڵئاوسانی دەمارەکان.

چارەسەرەکان بریتین لە، کەمێک پیاسە کردن لە نێوان هەر دوو کاتژمێرێک، دانیشتن بەشێوەیەکی رێک و تەندروست، دڵنیابوون لە پاکی ژینگەی شوێنی کارەکەت، گۆڕینی کورسی و شاشەی کۆمپیوتەرەکەت و کەمکردنەوەی ماوەی کارکردن.

 Metro