"دووكەڵی نێرگەلە زیانی لە دووكەڵی جگەرە زۆر زیاترە"

K24 - رانیە

تادێ خواست له‌سه‌ر كێشانی نێرگەله لە هەرێمی کوردستان زیاد دەبێت‌‌، به‌ تایبه‌تیش له‌ ناو توێژی گه‌نجاندا، پسپۆرانی تەندروستیش هۆشداری ده‌ده‌ن له‌وه‌ی نێرگەلە پەتایەکی ترسناکە و لەداهاتودا کاریگەرییە خراپ و مەترسیەکانی لەسەر کەسی بەکارهێنەر دەردەکەون،  جەخت لەسەر ئەوەش دەکەنەوە دووکەڵی نێرگەلە زۆر لە دووکەڵی جگەرە زیانی زیاتره‌.

بەراورد بە ساڵانی رابردوو ژمارەی كافتریا و ئەو کەسانەش دەستیان داوەتە نێرگەلەکێشان زۆر زیادی کردووە، بەشێک لە هاووڵاتیان دوای وازهێنان لە جگەرە پەنا بۆ دووکەڵی نێرگەلە و نێرگەلەکێشان دەبەن بە پاساوی ئەوەی زیانەکانی نێرگەلە کەمترن لەجگەرە، پسپۆرانی تەندروستی ئەو تێگەیشەنە بەهەڵە دەزانن و دەڵێن زیانە تەندروستیەکانی دووکەڵی نێرگەلە چەند بەرامبەری زیانەکانی دووکەڵی جگەرەیە.

شارەزایانی کۆمەڵناسی کۆکن لەسەر ئەوەی زیانە کۆمەڵایەتییەکانی نێرگەلە لە زیانە تەندروستییەکان کەمتر نین، نێرگەلەکێشان هێزی داهێنان و بەرەوپێشەوەچون لەگەنجاندا ناهێڵێ، نێرگەلە مرۆڤ ئاڵودەی دوکەڵێک دەکات ئیدی بەرە بەرە ژیانی بەکارهێنەرانی تێکدەشکێنێ و دوچاری لادانی کۆمەڵایەتی دەکات.

ھ.م