پیاوێك له‌ ماڵی نانسی عه‌جره‌م كوژرا

K24 - هه‌ولێر:

رۆژنامه‌یه‌كی لوبنانی ئاشكرای ده‌كات، شه‌وی رابردوو، كه‌سێك به‌ مه‌به‌ستی دزیكردن چووه‌ته‌ سه‌ر ماڵه‌كه‌ی نانسی عه‌جره‌م و ویستوویه‌تی بچێته‌ ژووری كچه‌كان، به‌ڵام هاوسه‌ری نانسی عه‌جره‌م ته‌قه‌ی لێكردووه‌ و پیاوه‌كه‌ی كوشتووه‌.

به‌ گوێره‌ی رۆژنامه‌ی "الاخباریه‌"ی لوبنانی، دره‌نگانی شه‌و كه‌سێك به‌ ده‌مانچه‌ چووه‌ته‌ ماڵه‌كه‌ی نانسی و توانیویه‌تی 3 پاسه‌وانی تایبه‌تی ماڵه‌كه‌ی نانسی دووربخاته‌وه‌.

به‌ گوێره‌ی رۆژنامه‌كه‌، دزه‌كه‌ به‌ ده‌مانچه‌كه‌وه‌ ویستوویه‌تی بچێته‌ ژووری كچه‌كانی و ئه‌گه‌رچی هاوسه‌ره‌كه‌ی نانسی ویستوویه‌تی به‌ پاره‌ دزه‌كه‌ رازی بكات و بڕوات، به‌ڵام ئه‌و به‌رده‌وام بووه‌ له‌ چوونی بۆ ژووری كچه‌كانی.

دواتریش هاوسه‌ری نانسی ته‌قه‌ی لێكردووه‌ و دزه‌كه‌ی كوشتووه‌.

رۆژنامه‌كه‌ ئه‌وه‌شی راگه‌یاندووه‌، ئێستا لێكۆڵینه‌وه‌ له‌ هاوسه‌ری نانسی ده‌ستپێكردووه‌ و به‌ گوێره‌ی یاساش به‌رگری له‌ خۆی كردووه‌.

ئاژانسی نیشتمانی بۆ راگه‌یاندن ناسنامه‌ی دزه‌كه‌ی ئاشكرا كردووه‌، كه‌ به‌ ده‌موچاوی داپۆشراو به‌ شه‌و چووه‌ته‌ ماڵه‌كه‌، دزه‌كه‌ كه‌سێكی سوورییه‌ و له‌دایكبووی ساڵی 1989یه‌.

ماڵه‌كه‌ی نانسی عه‌جره‌م له‌ یه‌كێك له‌ ڤێلاكانی "نیو سهیله‌ كسروان"ی پارێزگای جه‌به‌له‌ و ئێستاش پۆلیس سه‌رقاڵی لێكۆڵینه‌وه‌یه‌.