فەرەنسا ھەڕەشەی بەكارھێنانی چەكی ئەتۆم دەكات

K24 - ھەولێر

ئیمانوێل ماکرۆن، سەرۆکی فەرەنسا ھەڕەشەی بەکارھێنانی چەکی ئەتۆم دەکات، ئەگەر بەرژوەندییەکانی وڵاتەکەی بکەوێتە مەترسییەوە. ماکرۆن ستراتیژی ئەتۆمی وڵاتەکەی ئاشکرا کرد و داواش لە وڵاتانی ئەوروپا دەکات، پێکەوە ستراتیژیەتی بەرگری دابڕێژن.

سەرۆكی فەرەنسا گوتی: "دوای کۆتاییھاتنی رێککەوتنی چەکی ئەتۆمی مەودا مامناوەند فەرەنسا دەیەوێت گفتوگۆیەکی جدی و چڕ و پڕ بکرێت و قسەی ئەوروپییەکانیش بە ھەند وەربگیرێت، بە ئامانجی دڵنیایی و سەقامگیری و پاراستنی خۆیان. با بە روونی بڵێم ئەگەر گفتوگۆیەکی فراوانی لەوشێوەیە رێکخراو و وڵاتێک رێگری لێکرد، ئێمە دانانیشین و چاوەڕێ بین. ئەگەر سەرۆکی وڵاتێک ھێز و پابەندی فەرەنسا بە کەم سەیر بکات و چاوی لەوەبێت زیان بە بەرژەوەندییەکانمان بگەیەنێت. سەرۆکی ئەو وڵاتە دەبێ ئەوە بزانێت کە توانای چەکی ئەتۆمی ئێمە ئەوەندە ھەیە کە بتوانێ زیانی زۆر گەورەیان بە شادەماری ھێزی ئابووری و سیاسی و سەربازییان بگەیەنێت".

ماكرۆن، گوتیشی: "ئەگەر بەرژوەندییەکانمان بکەونە بەر ھەڕەشە دەکرێ بژاردەی سەربازیی رێگەمان بێت بۆ گفتوگۆ. چەکی ئەتۆمیش دوا بژاردەی ئێمە و بەردی بناغەی ئاسایش و گەرەنتیکار و پارێزەری بەرژوەندییەکانمانە".

ھ.م