مەسرور بارزانی: پشتیوانیی لە حکوومەتێك دەکەین کە پابەند بێت بە مافە دەستوورییەکانی هەرێمی کوردستان

K24 - هه‌ولێر:

ئەمڕۆ سێشەممە 2020/2/11، مەسرور بارزانی، سەرۆکی حکوومەتی هەرێمی کوردستان پێشوازیی لە محەممەد عەلی ئەلحەکیم، وەزیری دەرەوەی عیراق کرد.

لە دیدارەکەدا گفتوگۆ دەربارەی دوایین پێشهاتەکانی عێراق و ناوچەکە کرا. جەخت لە گرنگیی سەقامگیربوونی دۆخی عێراق و پێکهێنانی حکوومەتێکی گشتگیر کرایەوە، کە جێی رەزامەندیی زۆرینەی خەڵکی عێراق بێت و پەیوەندییەکی باشی لە گەڵ هەرێمی کوردستان و وڵاتانی دراوسێ و کۆمەڵگەی نێودەوڵەتیدا هەبێت.

پەیوەندییەکانی نێوان هەرێمی کوردستان و حکوومەتی فیدراڵی، تەوەرێکی دیکەی دیدارەکە بوو. سەرۆکی حکوومەتی هەرێمی کوردستان ئاماژەی بەوە دا، ئێمە پشتیوانیی لە حکوومەتێک دەکەین، کە پابەند بێت بە مافە دەستوورییەکانی هەرێمی کوردستان.