سەرۆك بارزانی پیرۆزبایی لە یەكێتی قوتابیان و لاوان دەكات

K24 - ھەولێر

سەرۆك مەسعود بارزانی، لە پەیامێكدا بەبۆنەی یادی 67 ساڵە دامەزراندنی یەكێتی قوتابیانی كوردستان و یەكێتیی لاوانی دیموكراتی كوردستان پیرۆزبایی ئاراستەی ھەردوو رێكخراوەكە دەكات و رایدەگەیەنێت "لاوان و قوتابیان، لە سەرەتای دامەزراندنی رێکخراوەکەیانەوە تا ئێستا، رۆڵیکی گرینگ و بەرچاویان لەكاری مەدەنی و رێكخراوەییدا گێڕاوە".

لە پەیامەكەی سەرۆك بارزانی دا ھاتووە: "قوتابیان و لاوان، لە قۆناخە جیاجیاکاندا، خزمەتی گەل و وڵاتیان کردووە و روحی بەرگری و بڕوابەخۆبوونیان لەناو لاوانی گەلەکەمان پاراستووە، ئێستا و داهاتوویش، ئەو چاوەڕوانییە لە قوتابیان و لاوانی خۆشەویست هەیە، کە پارێزەری بەها بەرزەكانی میللەتەكەمان بن و بە ورەیەكی بەرز و چاوكراوەیی زیاتر، کەڵک لە ئامرازە نوێیەکانی پەروەردە و فێرکردن وەربگرن و خۆیان بە زانست و زانیاری دەوڵەمەند بکەن و كادیری هۆشیار و بەتوانا بۆ خزمەتكردنی بەرژەوەندییەكانی خەڵكی كوردستان پەروەردە بکەن".

دەقی پەیامی سەرۆك بارزانی بۆ یەكێتی قوتابیانی كوردستان و یەكێتیی لاوانی دیموكراتی كوردستان

 بە ناوی خودای بەخشندە و میهرەبان

بە بۆنەی شەست و حەوت ساڵەی دامەزراندنی یەكێتیی قوتابیانی كوردستان و یەكێتیی لاوانی دیموكراتی كوردستان، گەرمترین پیرۆزبایی ئاراستەی لاوان و قوتابیانی خۆشەویستی كوردستان دەكەم و هیوای سەركەوتن و داهاتوویەكی گەشیان بۆ دەخوازم.

لاوان و قوتابیان، لە سەرەتای دامەزراندنی ڕێکخراوەکەیانەوە تا ئێستا، ڕۆڵیکی گرینگ و بەرچاویان لەكاری مەدەنی و ڕێكخراوەییدا گێڕاوە و جگە لەوەی قوتابخانەی پێگەیاندنی سەركردەی بە توانا و ڕۆڵەی هۆشیار و هەڵكەوتوو بوونە، وەک پێشمەرگەش، بەشدارییەکی کاریگەریان لە بزاڤی ڕزگاریخوازانەی گەلەکەماندا کردووە و لەو ڕێگەیەدا قوربانی و شەهیدیشیان بەخشیوە.

قوتابیان و لاوان، لە قۆناخە جیاجیاکاندا، خزمەتی گەل و وڵاتیان کردووە و ڕوحی بەرگری و بڕوابەخۆبوونیان لەناو لاوانی گەلەکەمان پاراستووە، ئێستا و داهاتوویش، ئەو چاوەڕوانییە لە قوتابیان و لاوانی خۆشەویست هەیە کە پارێزەری بەها بەرزەكانی میللەتەكەمان بن و بە ورەیەكی بەرز و چاوكراوەیی زیاتر، کەڵک لە ئامرازە نوێیەکانی پەروەردە و فێرکردن وەربگرن و خۆیان بە زانست و زانیاری دەوڵەمەند بکەن و كادیری هۆشیار و بەتوانا بۆ خزمەتكردنی بەرژەوەندییەكانی خەڵكی كوردستان پەروەردە بکەن.

دووبارە پیرۆزباییتان لێ دەكەم و هیوای سەرکەوتنی زیاترتان بۆ دەخوازم.

مەسعود بارزانی

17ـی2ـی2020