كوردستان24 بە سیستەمێكی جیهانی پرۆژەیەكی نوێ رادەگەیەنێت
بۆ یەكەمجار لەسەر ئاستی كوردستان و عێراق، بۆ هەر گەڕێكی خولی نایابی كوردستان، 3 خەڵاتی تایبەت بە دیزاینێكی ناوازە و بە سیستەمێكی جیهانی دەبەخشرێتە باشترین یاریزان، راهێنەر و جوانترین گۆڵ
كوردستان24 بۆ وەرزی نوێی خولی نایابی تۆپی پێی كوردستان، پرۆژەیەكی دیكەی وەرزشی لەپێناو پاڵپشتی وەرزشكارانی نێوخۆ رادەگەیەنێت، تێیدا بۆ هەر هەفتەیەكی خولی نایابی كوردستان 3 خەڵاتی تایبەت بە دیزاینێكی سەردەم و بە باشترین كوالیتی دەبەخشێت كە ئەمە یەكەمجار لەسەر ئاستی كوردستان و عێراق خەڵاتێكی لەم شێوەیە ببەخشرێت.
شێوازی دابەشكردنی خەڵاتەكان
دێسكی وەرزشی كوردستان24، لە رێگەی لێژنەیەكی تایبەت بۆ چاودێریكردنی خولی نایابی كوردستان بە سیستەمێكی جیهانی باشترین یاریزان، باشترین راهێنەر و جوانترین گۆڵی هەر گەڕێكی خولی نایابی كوردستان دیاریی دەكات و بۆ هەر یەكێكیان خەڵاتێكی تایبەت دەبەخشێت، لەم پێناوەدا كوردستان24 هەوڵی داوە هەماهەنگی لەگەڵ فیدراسیۆنی تۆپی پێی كوردستان رێككەوتن بكات بۆ ئەوەی بە هاوبەشی خەڵاتەكە ببەخشن.
خەڵاتەكان لەسەر چ پێوەرێك دەبەخشرێت
كوردستان24 ساڵانە زۆرینەی یارییەكانی خولی نایابی كوردستان بە كوالیتییەكی بەرز لە سۆشیاڵ میدیا بە دەنگی باشترین كۆمێنتارەكان دەگوازێتەوە، لە رێگەی لێژنەیەك هەڵسەنگاندن بۆ هەموو رووداوەكانی یارییەكان دەكات، بۆ بەخشینی ئەم خەڵاتانە پشت بە دەنگی رۆژنامەنووسان، هاندەران و راهێنەران دەبەستێت، لەسەر ئەم بنەمایانە بۆ هەر هەفتەیەك جوانترین گۆڵ، باشترین یاریزانان و باشترین راهێنەر دیاریی دەكات و بۆ هەریەكێكیان خەڵاتێكی ناوازە و دەگمەنیان پێشكەش دەكات.
بڕیارە رۆژی 7/11/2024 كە دەكاتە رۆژی پێنجشەممە وەرزی نوێی خولی نایابی تۆپی پێی كوردستان بۆ ساڵی 2024 ـ 2025 دەست پێ بكات، خولەكە بە بەشداریی 16 یانە بەڕێوە دەچێت، لە كۆتایی خولەكەش چوار یانە بۆ خولی پلەیەكی كوردستان دادەبەزێت، بۆ هەر یانەیەكیش دەتوانێت چوار یاریزانی پیشەگەر بۆ ریزەكانی بگوازێتەوە، یاریزانانی كوردی دەرەوەی هەرێمی كوردستانیش بە پیشەگەر هەژمار دەكرێت.
