ریاڵ مەدرید زەنگی مەترسی بۆ یانەکانی لالیگا و چامپیۆنزلیگ لێدا

یانەی ریاڵ مەدرید توانی بە ئەنجامێکی گەورە لە سێڤییا بەرێتەوە و بە ئاستە نایابەکەی زەنگی مەترسی بۆ یانەکانی لالیگا و چامپیۆنزلیگ لێدا.

لە گەڕی 18ی لالیگای ئیسپانی یانەی ریاڵ مەدرید لە یاریگەی سانتیاگۆ بێرنابیۆ رووبەڕووی سێڤییا بووە و دوای پێشکەشکردنی ئاستێکی بەرز بە ئەنجامی 4-2 گۆڵ یارییەکەی لە بەرژەوەندی خۆی کۆتایی پێهێنا.

گۆڵەکانی ریاڵ مەدرید لە رێگەی ئێمباپێ، ڤاڵڤێردی، رۆدریگۆ و براهیم دیاز لە خولەکەکانی (10،20،34،53) تۆمارکران و دوو گۆڵەکەی سێڤییاش لە رێگەی یاریزانان رۆمێرۆ و لۆکیباکیۆ لە خولەکەکانی (35 و 85) نووسرایەوە.

دوای یارییەکە ئانچێلۆتی رایگەیاند: یارییەکی نایابمان ئەنجامدا، ئاسان نییە ئەم ئەنجامە لە 2025 دووبارە بکەینەوە بەڵام هەوڵدەدەین لەسەر هەمان شێواز بەردەوام بین.

لەبارەی ئێمباپێوە ئانچێلۆتی گوتی: دوێنێ گوتم کێشەی خۆنەگونجاندنی ئێمباپێ لەگەڵ ریاڵ مەدرید کۆتاییهاتووە، ئەمڕۆ قسەکەم راست دەرچوو، بەهۆی ئەو کوالێتییە بەرزەی هەیەتی توانی بەسەر کێشەکانیدا زاڵ بێت و ئەو دۆخە سەختە تێپەڕێنێت.

ڤاڵڤێردی لەبارەی گۆڵەکەی بەرامبەر سێڤییا دەڵێت: دوێنێ راهێنانم لەسەر ئەو شێوازە بوو، هەرچەندە کارلۆ بە دڵی نەبوو بەڵام یاریدەدەرەکەی پشتگیری کردم و پێی گوتم دەبێت بەو لێدانە بەهێزانە گۆڵ بکەیت، منیش ئەنجاممدا.

رۆدریگۆی خاوەنی گۆڵی سێیەمی ریاڵ مەدرید ئاماژەی بەوەکرد: پەیوەندییەکی زۆر باشی لەگەڵ ئێمباپێ هەیە و بە تێپەڕبوونی کات ئاستی یاریزانە فەڕەنسییەکە بەرزتر دەبێتەوە.

دوای کۆتاییهاتی گەڕی 18ی لالیگا، ریاڵ مەدرید خاڵەکانی بوو بە 40 خاڵ و لە ریزبەندی دووەم دەبیندرێت، یانەی ئاتلێتیکۆ مەدریدیش بە تۆمارکردنی 41 خاڵی پێشەنگی لالیگای گرتووە، بەڵام بارسێلۆنا دوای دۆڕانەکەی دابەزی بۆ سێیەمی خولەکە.