کۆبوونەوەی پارتی و یەکێتی دواخرا

کۆبوونەوەی پارتی و یەکێتی لەبارەی پێکهێنانی کابینەی نوێی حکوومەتی هەرێمی کوردستان؛ دواخرا. 

وا بڕیاربوو پێشنیوەڕۆی ئەمڕۆ چوارشەممە، 29-01-2025، هەردوو شاندی تەکنیکیی پارتی دیموکراتی کوردستان و یەکێتیی نیشتمانیی کوردستان بۆ جاری پێنجەم لەبارەی پێکهێنانی کابینەی دەیەمی حکوومەتی هەرێمی کوردستان کۆببنەوە؛ بەڵام کۆبوونەوەکە دواخرا. 

بە گوێرەی زانیارییەکانی کوردستان24، کۆبوونەوەکە بەهۆی هەندێ پابەندیی حکوومی و حزبیی هەردوو لایەوە بۆ کاتێکی نادیار دواخراوە. 

چاوەڕێ دەکرا، لە کۆبوونەوەکەی ئەمجارەی پارتی و یەکێتی، بەرنامەی کاری هاوبەشی هەردوو حزب بۆ پێکهێنانی کابینەی دەیەمی حکوومەت ئامادە بکرێت. 

تاوەکوو ئێستە پارتی و یەکێتی چوار جار بۆ گفتوگۆ لەبارەی پێکهێنانی کابینەی دەیەمی حکوومەت کۆبوونەوەتەوە، دوایین کۆبوونەوەش ڕۆژی سێشەممە، 21-01-2025، لە بارەگای مەکتەبی سیاسیی یەکێتی لە هەولێر کرا. 

لە هەڵبژاردنی خولی شەشەمی پەرلەمانی کوردستان کە ڕۆژی 20-10-2024 کرا، پارتی 39 کورسی و یەکێتیش 23 کورسی بەدەست هێنا.