دلاوەر ئاژگەیی: هه‌نارده‌كردنه‌وه‌ی نه‌وتی هه‌رێمی كوردستان سه‌ره‌تایه‌كه بۆ چاره‌كردنی كێشه‌كانی دیكه
نوێنەری حکوومەتی هەرێمی کوردستان لە یەکێتیی ئەورووپا بەشداری لە کۆبوونەوەی هاوبەشیی یەکێتیی ئەورووپا و عێراق تایبەت بە وزە دەکات؛ هاوكات تیشك ده‌خاته سه‌ر پرسی دەرهێنان و هەناردەکردنی نەوتی کوردستان و ئەو کێشانەی لە ڕابروودا له‌م باره‌وه لە نێوان حکوومەتی هەرێمی كوردستان و عێراق له ئارادا بوون.
چوارشه‌ممه، 5ـی شوباتی 2025، دلاوەر خالید ئاژگەیی، نوێنەری حکوومەتی هەرێمی کوردستان لە یەکێتیی ئەورووپا هاوشان لەگەڵ شاندی حکوومەتی فیدراڵی عێراق بەشداری لە کۆبوونەوەی هاوبەشیی نێوان عێراق و یەکێتیی ئەورووپا کرد کە تایبەت بوو بە پرسی وزە و لە کۆبوونەوەکەدا تیشک خرایە سەر هاوکاریی هەردوولا له باره‌ی وزە بە تایبەتی پرسی نەوت و گاز.
دلاوەر خالید ئاژگەیی لە گوتەیەکدا تیشکی خستە سەر پرسی دەرهێنان و هەناردەکردنی نەوتی کوردستان و ئەو کێشانەی لە ڕابروودا لە نێوان حکوومەتی هەرێمی كوردستان و حكوومه‌تی فیدراڵی عێراق له ئارادا بوون و بوونه هۆکاری وەستانی هەناردەکردنی نەوتی کوردستان و ئەو زەرەرە ئابوورییەی بەو هۆیەوە ڕووبه‌ڕووی هەرێمی کوردستان و عێراق بووه‌تەوە.
نوێنەری حکوومەتی هەرێمی کوردستان لە یەکێتیی ئەورووپا هاوكات باسی لە دوایین بڕیاری پەرلەمانی عێراق کرد وەکوو هەنگاوێکی ئەرێنی بۆ چارەکردنی کێشەکە و هیوای خواست سەرجەم کێشەکانی نێوان هەردوولا چارە بکرێن.
هەر لەو کۆبوونەوە نوێنەری یەکێتیی ئەورووپا پێشوازیی لەو بڕیارە نوێیە کرد و وەکوو هۆكارێكی گرنگ بۆ سەقامگیریی سیاسی لە عێراق باسی لێوە کرد و دەستخۆشی لە لایەنی هه‌ردوو حكوومه‌تی فیدراڵی عێراق و حكوومه‌تی هه‌رێمی کوردستان کرد بۆ چارەکردنی کێشەکان لە ڕێگەی دیالۆگ و لێکتێگەیشتن.