ئانۆ جەوهەر: پێشمەرگە بۆ پاراستنی هەموو پێکهاتەکانی کوردستان شەڕی داعشی کرد

ئانۆ جەوهەر ئاماژە بەوە دەدات، هێزەکانی پێشمەرگە بە سەرپەرشتیی سەرۆک بارزانی، بۆ پاراستنی هەموو پێکهاتەکانی کوردستان شەڕی داعشی کرد و سەدان قوربانی دا. 

کاتژمێر 8:00ـیی بەیانیی ئەمڕۆ چوارشەممە، 23-04-2025، بە ئامادەبوونی ژمارەیەکی زۆر لە بەرپرسانی باڵا و سەرکردەکانی عێراق و هەرێمی کوردستان و جیهان و پەرلەمانتارانی وڵاتان و نوێنەرانی حکوومەتەکان لە ئەمەریکا، ئەورووپا و ڕۆژهەڵاتی ناوەڕاست، لە ژێر دروشمی ( بەرەو یەکبوون لە باوەڕدا)، ڕۆژی نزای نیشتمانی لە کوردستان دەستی پێ کرد.

ئانۆ جەوهەر، وەزیری گواستنەوە و گەیاندنی حکوومەتی هەرێمی کوردستان کە لە پێکهاتەی کریستییانە، لە گوتارێکدا ئاماژەی بەوە دا "ئەم ڕێوڕەسمە پیرۆزە لە کاتێکدا لە هەرێمی کورستان بەبێ ترس بەڕێوە دەچێت کە جیهان لە ئاڵنگاری و ئاڵۆزی و مەترسی گەورەدایە. هەڵبەتە ئەم ڕێورەسمە دەرخەری پێکەوەژیانی ئاشتییانەی نێوان پێکهاتە و ئایینەکانی جیاوازی هەرێمی کوردستانە و شانازییە کە باوەڕدارانی هەموو ئایینزاکان، بەبێ ترس، خوا پەرستی دەکەن."

ئانۆ جەوهەر لە بەشێکی دیکەی گوتارەکەیدا باسی لە شەڕی دژی داعش کرد و گوتی: "لە سەردەمی شەڕی داعش، سەرۆک بارزانی جەختی لە هەڵوێستی جێگریی خۆی لەبارەی پێکەوەژیانی ئاشتیی نێوان پێکهاتە و ئایینەکانی هەرێمی کوردستان کردەوە و گوتی، یان پێکەوە دەژین یانیش پێکەوە دەمرین. ئەمە تەنها گوتەیەک نەبوو، بەڵکوو پەیمانێک بوو، بۆ هاوسۆزی و قوربانیدان، بۆ نەوەکانی ئێستا و داهاتوو."

وەزیری گواستنەوە و گەیاندن باسی لەوەش کرد "سەرۆک بارزانی بە سەرکردایەتییەکی حەکیمانە سەرپەرشتیی شەڕی هێزەکانی پێشمەرگەی کوردستان لە دژی ڕێکخراوی تیرۆریستیی داعش کرد بۆ پاراستنی هەرێمی کوردستان بە هەموو پێکهاتەکانییەوە، موسوڵمان، کریستییان، ئێزدی و پەیڕەوانی ئایینەکانی دیکە. بەداخەوە لە ئەنجامی ئەو شەڕەدان، سەدان پێشمەرگە شەهید بوون و سەدانی دیکەش بریندار بوون. هیچ شتێک لەوە پیرۆزتر نییە لەپێناو خاکەکەت خۆت بکەیە قوربانی."

بە گوتەی وەزیری گواستنەوە و گەیاندنی حکوومەتی هەرێمی کوردستان "پەیوەندی و دۆستایەتیی کورد و نەتەوە و ئایینە جیاوازەکان پەیوەندییەکی قوڵی دیرۆکی و ھاوبەشی نیشتیمانی بووە، وێڕای جیاوازی لە ئایین و زمان و کولتوور، بەڵام ھەموویان لە ژێر سێبەری نیشتماندا برا و ھاوخەبات بوونە و لە کۆی بارودۆخە خۆش و ناخۆشەکاندا دەستبار و تەواوکەری یەکتر بوونە."