راگەیه‌ندراوێك لە ژووری ئۆپەراسیۆنی پارێزگای هەولێرەوە

K24 - هەولێر:

ژووری ئۆپەراسیۆنی پارێزگای هەولێر رایگەیاند، بە لەبەرچاوگرتنی پێویستیی هاووڵاتیان بە سەردانی پزیشك بۆ چارەسەركردنی نەخۆشییەكانیان و دوای راوێژكردن لەگەڵ وەزارەتی تەندروستی و وەزارەتی ناوخۆی حكومەتی هەرێمی كوردستان، بڕیاریانداوە نۆڕینگەكان و كۆمەڵگە پزیشكییەكان لە سنووری پارێزگاكە بكرێنەوە، بەڵام بە چەند مەرجێك.

دەقی راگەیەندراوەكەی ژووری ئۆپەراسیۆنی پارێزگای هەولێر:

سەبارەت بە نۆڕینگە و سەنتەر و کۆمەڵگا پزیشکییەکانی سنووری پارێزگای هەولێر، لەبەر دۆخی تەندروستی و پێداویستی خەڵك، ژووری ئۆپەراسیۆنی پارێزگای هەولێر بەڕاوێژ لەگەڵ وەزارەتی تەندروستی و وەزارەتی ناوخۆی حکومەتی هەرێمی کوردستان، بڕیاریدا بەکردنەوەیان، بەم مەرجانەی خوارەوە:

یەکەم: کردنەوەی نۆڕینگە و سەنتەر و کۆمەڵگا پزیشکییه‌کان ئارەزوومەندانەیە.

دووەم: لە هۆڵی چاوەڕوانی نابێت لە 4 نەخۆش زیاتری لێبێت و نێوانی هەر یەکێکیان لە دوومەتر کەمتربێت.

سێیەم: پزیشك دەبێت دەستکێشی لەدەستبێت و ماسك ببەستێت.

چوارەم: نەخۆش نابێت لە یەك هاوەڵ زیاتری لەگەڵ بێت و دەبێت هەردووکیان ماسکیان بەستبێت.

پێنجەم: رۆژانە نۆڕینگە و سەنتەر و کۆمەڵگە پزیشکییەکان تەعقیم بکرێن.

شەشەم: رۆژانە نابێت له ١٥ نەخۆش زیاتر ببینرێن.

ژووری ئۆپەراسیۆنی پارێزگای هەولێر

2020/8/4

H.B