نێچیرڤان بارزانى پێشوازى لە شاندێکى ئیسپانى کرد

K24 - ھەولێر

ئەمڕۆ دووشەممە 21/9/2020 نێچیرڤان بارزانى، سەرۆکى هەرێمى کوردستان، پێشوازى لە خوان خۆسێ ئیسکۆبار باڵیۆزى ئیسپانیا لە عێراق و شاندێکى بازرگانیى یاوەرى کرد.

لە دیدارێکدا برەودان بە پەیوەندییەکانى هەرێمى کوردستان و عێراق لەگەڵ ئیسپانیا بەتایبەتى لە بوارى ئابوورى و بازرگانیدا تاوتوێ کرا و  نێچیرڤان بارزانى دووپاتىکردەوە، کە هەرێمى کوردستان ئامادەیە هەموو هاوکارى و ئاسانکارییەک پێشکەش بە کەرتى تایبەت و وەبەرهێنەرانى ئیسپانى بکات، بۆئەوەى دەرەفەتى کار و سەرمایەگوزارییان بۆ بڕەخسێت و هاوبەشى و بەشدارى لە بنیاتنان و پەرەپێدانى کەرتە جیاکانى هەرێمى کوردستاندا بکەن.

دۆخى ناوچەکە بەگشتى، پرۆسەى سیاسى لە عێراق، پەیوندییەکانى هەرێمى کوردستان و حکوومەتى فیدرالى عێراق و گفتوگۆى چارەسەرکردنى کێشەکانیان، بڵاوبوونەوەى پەتاى ڤایرۆسى کۆرۆنا، مەترسییەکانى تیرۆر و چەند پرسێکى دیکەى جێى بایەخى هاوبەش، تەوەرێکى دیکەى دیدارەکە بوو.