پیتەر دێ گراف: لە هەرێمی کوردستان کار ئاسانییەکی زۆر بۆ کۆمپانیاکانی وەبەرهێنان هەیە
ئەندامی شاندی بازرگانی هۆڵەندا بۆ هەرێمی کوردستان ڕایگەیاند، دەیانەوێت ئەزموونی هۆڵەندا لە کەرتی کشتوکاڵی بهێننە هەرێمی کوردستان، دەشڵێت: ئێرە کار ئاسانییەکی زۆر بۆ کۆمپانیاکانی وەبەرهێنان کراوە.
سێشەممە 9ی ئەیلوولی 2025، پیتەر دێ گراف، ئەندامی شاندی بازرگانی هۆڵەندا بۆ هەرێمی کوردستان بە کوردستان24ی گوت: ئێمە مێژوویەکی دوور و درێژی بازرگانیمان لەگەڵ هەرێمی کوردستان هەیە، مەبەستمان لێرە ئەو دەرفەتە بازرگانیانە بدۆزینەوە بۆ ئەوەی وەبەرهێنانی زیاتر بکەین.
ئاماژەشی دا، هەرێمی کوردستان جیاوازە لە عێراق و ناوچەکانی دیکە، لێرە کار ئاسانی بۆ وەبەرهێنەران کراوە و دەرگای بە ڕووی کۆمپانیاکانی وەبەرهێنان کراوەتەوە، تەنانەت مەسرور بارزانی، سەرۆک وەزیرانی هەرێمی کوردستان ئەوەی دووپاتی کردووەتەوە.
ئەندامی شاندی بازرگانی هۆڵەندا دەشڵیت: ئەمە ڕاستییەکی حاشاهەڵنەگرە هەرێمی کوردستان و بە تایبەت هەولێر بەرەوپێشچوونێکی زۆر باشی بە خۆییەوە بینیوە، بازرگان و وەبەرهێنەرێکی زۆر هاتوونەتە ئێرە ئەمەش ئاماژەیەکی زۆر باشە.
گوتیشی: بەرهەمێکی زۆری هۆڵەندی هاوردەی هەرێمی کوردستان دەکرێت، چاویان لەوەیە لە کەرتی کشتوکاڵیش پەیوەندی بازرگانی دروست بکەن، چونکە هۆڵەندا وڵاتێکی پێشکەوتووە لە کەرتی کشتوکاڵ، دەیانەوێت ئەزموونی خۆیان بێننە هەرێمی کوردستان.
