ئەمڕۆ پارتی گەورەترین کەرنەڤاڵی بانگەشەی هەڵبژاردن لە هەولێر ساز دەکات
بڕیارە بە ئامادەبوونی سەرۆک بارزانی، مەسرور بارزانی و نێچیرڤان بارزانی هەردوو جێگری سەرۆک بارزانی و بەرپرسانی باڵای پارتی دیموکراتی کوردستان، گەورەترین کەرنەڤاڵی جەماوەریی بۆ سەرخستنی لیستی ژمارە 275 لە یاریگای نێودەوڵەتیی فەرەنسۆ هەریری بەڕێوەدەچێت.
بڕیارە ئەمڕۆ هەینی، 7ـی تشرینی دووەمی 2025، بە ئامادەبوونی سەرۆک بارزانی، مەسرور بارزانی و نێچیرڤان بارزانی هەردوو جێگری پارتی دیموکراتی کوردستان، گەورەترین کەرنەڤاڵی جەماوەریی بۆ سەرخستنی لیستی ژمارە 275، لە هەولێری پایتەخت بەڕێوەبچێت.
کەرنەڤاڵەکە لە یاریگای نێودەوڵەتیی فەرەنسۆ هەریری بەڕێوەدەچێت و چاوەڕوان دەکرێت زیاتر لە 50 هەزار ئەندام، لایەنگر و هاووڵاتی بەشداری تێدا بکەن، کە چەندان چالاکیی جۆراوجۆر لەخۆدەگرێت.
لەم بارەیەوە، سەنگەر کانەبی، بەرپرسی لقی مەخمووری پارتی دیموکراتی کوردستان، بە کوردستان24ـی ڕاگەیاند: "لایەنگران و کادیرانی پارتی بەپەرۆشەوە ئەمڕۆ بەشداری لەو کەرنەڤاڵە دەکەن."
ناوبراو گوتیشی: "بەرپرسانی باڵای پارتی دیموکراتی کوردستان ئامادەی کەرنەڤاڵەکە دەبن، هەر بۆیە چاوەڕوان دەکرێت ئەمە یەکێک بێت لە قەرەباڵغترین کەرنەڤاڵەکانی بانگەشە بۆ سەرخستنی لیستی 275ـی پارتی."
لە 11ـی تشرینی دووەمی 2025 پرۆسەی هەڵبژاردنی خولی شەشەمی پەرلەمانی عێراق بەڕێوەدەچێت، کە نزیکەی 30 ملیۆن کەس لە کۆی 46 ملیۆن کەس مافی دەنگدانیان هەیە. هەروەها نزیکەی حەوت ملیۆن کەس کارتی دەنگدانیان نوێ نەکردووەتەوە بۆیە ناتوانن بەشداری هەڵبژاردن بکەن.
