نێچیرڤان بارزانی و ئەیاد عەللاوی پرسی پێکهێنانی حکوومەتی نوێ و قۆناغی دوای هەڵبژاردنیان تاوتوێ کرد
سەرۆکی هەرێمی کوردستان و سەرۆکی بزووتنەوەی ویفاقی نیشتمانیی عێراق، لە دیدارێکدا دۆخی سیاسیی عێراق و سیناریۆکانی قۆناغی دوای هەڵبژاردنیان خستە بەر باس و جەختیان لە گرنگیی گفتوگۆی نێوان لایەنەکان کردەوە.
ئێوارەی ئەمڕۆ دووشەممە 24ـی تشرینی دووەمی 2025، نێچیرڤان بارزانی، سەرۆکی هەرێمی کوردستان پێشوازی لە دکتۆر ئەیاد عەللاوی، سەرۆکی بزووتنەوەی ویفاقی نیشتمانیی عێراق و شاندێکی یاوەری کرد.
لە کۆبوونەوەکەدا بە وردی تیشک خرایە سەر دۆخی گشتیی سیاسی لە عێراق و هەرێمی کوردستان و خوێندنەوە بۆ دەرەنجامەکانی هەڵبژاردنی ئەنجوومەنی نوێنەرانی عێراق کرا. هەردوولا بیروڕایان لەبارەی کاریگەریی ئەنجامەکان لەسەر نەخشەی سیاسیی داهاتووی وڵات ئاڵوگۆڕ کرد.
تەوەرێکی سەرەکیی دیکەی دیدارەکە تەرخان کرا بۆ تاوتوێکردنی سروشتی گفتوگۆ و دانوستانی نێوان لایەنە سیاسییەکان.
لەم چوارچێوەیەدا باس لەو هەنگاوانە کرا کە پێویستە بنرێن بە ئاڕاستەی پێکهێنانی کابینەی داهاتووی حکوومەتی فیدراڵ لە عێراق، بە شێوەیەک کە وەڵامدەرەوەی قۆناغەکە بێت.
