محەممەد حەسان: داوا دەکەم هەر دوو حکوومەتی هەرێم و عێراق بە زووترین کات پێکبهێن
نوێنەری تایبەتی سکرتێری گشتیی نەتەوە یەکگرتووەکان لە ئەنجوومەنی ئاسایشی نێودەوڵەتییەوە داوای پەلەکردن لە پێکهێنانی حکوومەتی نوێی عێراق و هەرێمی کوردستان دەکات و ڕاشیدەگەیەنێت، سەرەڕای ئەوەی لە سەرەتای ساڵی داهاتوودا ئەرکی یونامی کۆتایی دێت، بەڵام دەبێت پەیوەندییەکانی هەولێر و بەغدا لەسەر بنەمای دەستوور ڕێکبخرێنەوە و هێرشەکانی سەر دامەزراوە وزەکان ڕابگیرێن.
سێشەممە 2ـی کانوونی یەکەمی 2025، محەممەد حەسان، نوێنەری تایبەتی سکرتێری گشتیی نەتەوە یەکگرتووەکان بۆ عێراق و سەرۆکی نێردەی یونامی بەغدا لە ئەنجوومەنی ئاسایشی نێودەوڵەتی گوتارێک لە بارەی دواین پەرەسەندنەکانی عێراق پێشکەش کرد.
محەممەد حەسان لە گوتارەکەیدا گوتی: داوا دەکەم حکوومەتی نوێی هەرێمی کوردستان و عێراق بە زووترین کات پێکبهێت، کە دەبێتە هۆی چارەسەر کردنی کێشەکانی نێوانیان و باشتر کردنی پەیوەندییەکانیان، هیوادارین پرسە هەڵپەسێردراوەکانی نێوان هەولێر و بەغدا لەسەر بنەمای دەستوور چارەسەر بکرێن و هەماهەنگی بکەن.
دەشڵێت: لە عێراق ئێستا نزیکەی یەک ملیۆن ئاوارە لە ناوخۆی وڵاتدا هەیە، هەروەها زیاتر لە 100 هەزار ئێزدی خەڵکی شنگال دوای 11 ساڵ هێشتا لە نێو کەمپەکاندا دەژین و لە دۆخێکی زۆر خراپدان و بەشێکیان تاوەکوو ئێستا لە دەستی داعش ڕزگار نەکراون. ئاماژەشی دا، سەرەڕای ئەوە عێراق بەسەر ململانێیە ناوخۆییەکان سەرکەوتووە، بەڵام تاوەکوو ئێستا کێشەی ئەمنی و ئابووری بە تەواوی چارەسەر نەکراون.
نوێنەری تایبەتی سکرتێری گشتیی نەتەوە یەکگرتووەکان بۆ عێراق باسی لەوەش کرد، لە هێرشکردنە سەر دامەزراوەکانی عێراق و بە تایبەت هێرشەکەی سەر کێڵگەی غازی کۆرمۆر زۆر نیگەرانە و دەبێت دەستبەجێ ئەو هێرشانە ڕابگیرێن و ئەو کەسانەی لە هێرشەکە بەرپرسیارن دەبێت بدرێنە دادگا.
محەممەد حەسان ڕاشیگەیاند، حکوومەتی عێراق لە جێبەجێکردنی ستانداردەکانی پاراستنی مافەکانی مرۆڤ بەرپرسیارە، ئەوانیش مافی پێکهاتەکان، گەنجان و ئافرەتانە، هاوکات لەگەڵ ئازادی ڕادەربڕین، کە بنەمایە بۆ بوونی کۆمەڵگەیەکی دیموکرات.
هەروەها داواشی لە سەرکردەکانی عێراق کرد، ڕێز لە کچان بگرن و ڕێگری لە بە شوودانی پێشوەختە بگرن و ئەو کێشەیە چارەسەر بکەن، چونکە عێراق لەگەڵ نەتەوە یەکگرتووەکان بەرەو قۆناغێکی نوێ هەنگاو دەنێت.
گوتیشی: سەرەڕای ئەوە لە سەرەتای ساڵی داهاتوو ئەرکی یونامی لە عێراق تەواو دەبێت، بەڵام هەماهەنگییەکانمان لەگەڵ ئەو وڵاتە بەردەوام دەبێت و قۆناغێکی نوێ دەست پێ دەکات و لە پشتیوانی کردنی عێراق بەردەوام دەبێت، بۆ ئەوەی بە ڕاوێژی نەتەوە یەکگرتووەکان لەسەر بابەتەکانی ئابووری، کەش و هەوا، مافی مرۆڤ، ئاوارەکان، بەشداریی چالاکی ئافرەتان، گەنجان و پێکهاتەکان خۆی بنیات بنێتەوە.
