چوارەمین پێشانگەی کشتوکاڵ و پیشەسازیی خۆراک لە سلێمانی بەڕێوە دەچێت
بە بەشداریی زیاتر لە سەد کۆمپانیای ناوخۆ و بیانیی پێشانگەی کشتوکاڵ و پیشەسازیی خۆراک لە سلێمانی کرایەوە.
نەوزاد غەفوور، سەرۆکی ژووری بازرگانیی و پیشەسازیی سلێمانی، بە کوردستان24ی ڕاگەیاند، نزیکەی سەد کۆمپانیا و کارگە و وەبەرهێنەر لە پێشانگەی کشتوکاڵ و پیشەسازیی خۆراکی سلێمانی بەشدارییان کردووە، کۆمپانیاکان لە شارەکانی دیکەی عێراق و 10 وڵاتی دەرەوە هاتوون.
سەرۆکی ژووری بازرگانیی و پیشەسازیی سلێمانی ئاماژەشی دا "ئەم پێشانگەیە گرنگیی خۆی هەیە و دەرفەتێکە بۆ ناساندنی بەرهەمە نێوخۆکان و ئاشناکردنی کارگە و وەبەرهێنەرەکانمانە بە تەکنەلۆجیای نوێی کشتوکاڵ و پیشەسازی خۆراک."
نەوزاد غەفوور، جەختیشی کردەوە، ئەوان وەکو ژووری بازرگانیی و پیشەسازیی سلێمانی، هانی ئەوە دەدەن پەرە بە بەرهەمی ناوخۆی هەرێمی کوردستاندا بدەین نەک تەنیا هاوردەکردن و گەشبینین بە کەمکردنەوەی هاوردە و زیادکردنی بەرهەمی ناوخۆ.
هەروەها نەوزاد غەفوور گوتیشی، ئەم پێشانگەیە زیاتر تایبەتە بە بازرگانان و خاوەنکارەکان، بەڵام بێگومان هاووڵاتی ئاساییش دەتوانێت سەردانی پێشانگەکە بکات چونکە بەکاربەر هەر هاووڵاتییە.
