حەج و عومرەی هەرێم تەندەری گواستنەوەی کەلوپەلی حاجیانی ڕاگەیاند

بەڕێوەبەرایەتیی گشتیی حەج و عومرەی هەرێمی کوردستان، ئاگادارییەکی ئاراستەی سەرجەم کۆمپانیاکانی گواستنەوە کرد سەبارەت بە پرۆسەی هێنانەوەی کەلوپەلی حاجیان بۆ ئەمساڵ.

ئەمڕۆ چوارشەممە، 7ـی کانوونی دووەمی 2026، بەڕێوەبەرایەتیی گشتیی حەج و عومرەی هەرێمی کوردستان لە ڕاگەیەندراوێکدا، داوای لە سەرجەم کۆمپانیاکانی گواستنەوەی کەلوپەل کردووە، کە هەر کۆمپانیایەک ئارەزووی بەشداریکردنی هەیە لە کەمکردنەوەی (تەندەر)ـی هێنانەوەی کەلوپەلی حاجیان لە شاری مەککەی پیرۆزەوە بۆ سەرجەم پارێزگا و ئیدارە سەربەخۆکانی هەرێمی کوردستان، دەتوانن سەردانیان بکەن.

لە ڕاگەیەندراوەکەدا هاتووە، وەرگرتنی فۆڕمی تەندەر لە ڕۆژی چوارشەممە 7-1-2026ەوە دەستپێدەکات و کۆمپانیاکان دەتوانن سەردانی بەشی یاسایی و گرێبەستەکان لە دیوانی بەڕێوەبەرایەتیی گشتیی حەج و عومرە بکەن.

بەڕێوەبەرایەتییەکە ئاماژەی بەوە داوە، دواکات بۆ وەرگرتن و گەڕاندنەوەی تەندەر، کاتژمێر 11ـی پێشنیوەڕۆی ڕۆژی دووشەممە، 17-1-2026 دەبێت.

بۆ یەکەم جار لە ساڵی 2025، حکوومەتی هەرێمی کوردستان ناونووسینی فەڕیزەی حەجی کردە ئەلیکترۆنی، کە نزیکەی 90 هەزار کەس ناوی خۆیان تۆمار کرد، بەڵام دوای ڕاکێشانی تیروپشک ناوی  پێنج هەزار و 120 کەس دەرچوو کە بڕیارە ئەمساڵ 2026 سەردانی سعوودیە بکەن بۆ بەجێهێنانی فەریزەی حەج.