فۆتۆگرافەرێك خانووە كۆنەكانی سلێمانی ئەرشیف دەكات
K24 – سلێمانی
خاتوو سارا نامۆ، یەكێكە لە فۆتۆگرافەرەكانی سلێمانی پڕۆژەی ئەرشیفی گەڕەکە کۆنەکانی شاری سلێمانی ئەنجام دەدات و بە زوومی كامێراكەی دیمەنی خانووە كۆنەكان ئەرشیف دەكات.
لەمیانی بەشداریكردنی لە بەرنامەی رۆژباشی كوردستان24 سارا نامۆ گوتی: "وەك فۆتۆگرافەرێك كە رۆژانە بە گەڕەكە كۆنەكانی سلێمانی دا تێدەپەڕم، ھەستم بەوەكردووە كە خانووەكان بەرەو لەناوچوونن، ئەم بیرۆكەیە بیرۆكەیەم لا گەڵاڵە بوو كە دیمەنەكان ئەرشیف بكەم".
گوتیشی: "ئێستا پڕۆژەكەم بەردەوامە و وێنەی زۆرێك لە گەڕەك و خانووە كۆنەكان ماوە وێنەیان بگرم و ئەرشیفیان بكەم، دەمەوێت وێنەی یەك بە یەكی خانووە كۆنەكان بگرم".
سارا نامۆ، ئاماژەی بەوەشكرد: "تائێستا لایەنە پەیوەندیدارەكان لەبارەی پڕۆژەكەی پەیوەندییان پێوە نەكردوم، راستە من لای خۆم وێنەكان ئەرشیف دەكەم، بەڵام ئەگەر شوێنێكی فەرمی ھەبێت بۆ ئەرشیف كردنیان، بێگومان كارێكە باشتر دەبێت".