دەزگای ئاسایشی هەرێم لە بارەی رووداوەکەی نزیک بازگەی کەڵەوانان روونکردنەوە دەدات
دەزگای ئاسایشی هەرێم، رایدەگەیەنێت، رووداوەکەی ئەمشەوی نزیک بازگەی کەڵەوانان، تەنیا رووداوێکی هاتوچۆی ئاسایی بووە.
چوارشەممە، 18ـی شوباتی 2026، کارزان شێرکۆ، گوتەبێژی دەزگای ئاسایشی هەرێم، لە راگەیەنراوێکدا ئاماژەی بەوە دا، ئۆتۆمبێلێکی جۆری لاندکرۆزی گولەنەبڕ، نزیک بازگەی کەڵەوانان، تووشی رووداوێکی هاتوچۆ بوو و، لە ئەنجامدا وەرگەڕا و گڕی گرت.
بە پێی قسەکانی گوتەبێژەکە، دوو سەرنشین لە نێو ئۆتۆمبێلەکەدا هەبوون، یەكێکیان گیانی لە دەستداوە و ئەوەی دیکەیان بریندار بووە.
کارزان شێرکۆ، هەموو ئەو دەنگۆیانەی رەت کردەوە، کە باس لە بە ئامانجگرتنی ئۆتۆمبێلەکە لە رێگەی درۆنەوە دەکەن و دەڵێت: تەنیا رووداوێکی هاتوچۆی ئاسایی بوو.