مەسرور بارزانی: پەلامارەکانی سەر هەرێمی کوردستان هیچ پاساوێک هەڵناگرن

سەرۆکوەزیران جەخت دەکاتەوە، بە هیچ جۆرێک قبووڵی ناکەن، پەلامارەکانی سەر هەرێمی کوردستان بەردەوام بن. داواشی لە حکوومەتی عێراق کرد، سنوورێک بۆ تاوانباران دابنێت. 

ئەمڕۆ یەکشەممە، 08ـی ئاداری 2026، سەرۆک بارزانی و مەسرور بارزانی، سەرۆکی حکومەتی هەرێمی کوردستان؛ بەشدارییان لە پرسەی شەهید (وڵات تاهیر)ـدا کرد کە شەوی رابردوو (شەممە، 07ـی ئاداری 2026)، لە ئەنجامی هێرشێکی درۆنی بۆ سەر فڕۆکەخانەی نێودەوڵەتیی هەولێر، شەهید بوو. 

سەرۆکوەزیران لە لێدوانێکی رۆژنامەوانیدا، پرسە و سەرەخۆشی خۆی ئاراستەی بنەماڵەی شەهید وڵات تاهیر، سەرۆک بارزانی و گەلی کوردستان کرد و گوتی "بێگومان ئەمە یەکەم شەهیدی کوردستان نییە و دوا شەهیدیش نابێت". 

سەرۆکوەزیران مەسرور بارزانی، بە توندی سەرکۆنەی هێرشەکانی سەر هەرێمی کوردستانی کرد و رایگەیاند، ئەو پەلامارانە هیچ پاساوێک هەڵناگرن و تەنیا لەبەر رق و کینەیەکی زۆرە بەرانبەر بە کوردستان و گەلەکەی. جەختیشی کردەوە، "ئەو شۆفێنیانە پێویستە ئەوە بزانن کە ئەم هەڵوێستە دوژمنکارانەی ئێستا بەرانبەر بە هەرێمی کوردستان گرتوویانەتە بەر، لەبیری خەڵكی کوردستان ناچێت". 

سەرۆکوەزیران مەسرور بارزانی، داوای لە حکوومەتی فیدراڵی عێراق و پەرلەمان کرد هەڵوێستیان هەبێت و سنوورێک بۆ ئەم تاوانبارانە دابنێن؛ "چونکە بەداخەوە تا ئێستاش ئەو گروپانەی ئەم کارانە دەکەن، لەلایەن حکوومەتی بەغداوە پارەدار دەکرێن و مووچە و چەکیان پێدەدرێت". 

مەسرور بارزانی گوتیشی "داواشمان وایە ئەم تیرۆریستانە چیتر، پەلاماری کوردستان نەدەن و بە زۆر نەمانخەنە مەوقفێک کە پێویست بێت ئێمە هەڵوێستی تر وەربگرین." دووپاتیشی کردەوە، "بە هیچ جۆرێک قبووڵی ناکەین ئەم هێرشانە بەردەوام بن و قبووڵیش ناکەین خوێنی شەهیدانی ئێمە بە فیڕۆ بڕوات، هەموو هەوڵێک دەدەین کوردستان لە شەڕ و ئاژاوە بەدوور بگرین، بەڵام وەک جەنابی سەرۆک بارزانی فەرمووی هەموو شتێک سنووری هەیە، هیوادارین حکوومەتی فیدراڵیش بێنە سەر هێڵ و سنوورێک بۆ تاوانباران دابنێت و چیتر پشتیوانییان نەکات". 

سەرۆکوەزیران مەسرور بارزانی دووپاتی کردەوە، هەرێمی کوردستان هیچ کاتێک جێگەی مەترسی نەبووە و نابێت بۆ سەر هیچ وڵاتێکی دراوسێ. هاوکات داوای لە کۆمەڵگەی نێودەوڵەتی کرد، یارمەتیدەر بێت لە پاراستنی هەرێمی کوردستان. 

لەبارەی دۆخی کارەباش، سەرۆکوەزیران روونیکردەوە، کێشەکە لای ئەوان نییە، بەڵکوو کۆمپانیاکانی بەرهەمهێنانی نەوت و گاز بەرهەمەکانیان کەمکردووەتەوە و هیوای خواست، دوای تەواوبوونی شەڕ، دۆخەکە بگەڕێتەوە ئاستی پێشووی خۆی و کێشەکە بە زووترین کات چارەسەر بکرێت.