وەزارەتی دارایی: لەگەڵ گەیشتنی تەواوی تەمویلی مووچە، دەست بە دابەشکردنی دەکەین

وەزارەتی دارایی هەرێمی کوردستان، گەیشتنی بەشێکی دیکەی پارەی تەرخانکراو بۆ مووچەی مانگی شوبات راگەیاند. وەزارەتەکە روونی کردەوە، کە بە گەیشتنی تەواوی پارەکە، راستەوخۆ پڕۆسەی دابەشکردنی مووچە دەست پێدەکات.

یەکشەممە، 8ـی ئاداری 2026، وەزارەتی دارایی و ئابووریی هەرێمی کوردستان، لە راگەیەنراوێکدا ئاشکرای کرد، "بڕی 365 ملیار و 702 ملیۆن دینار، وەک بەشێکی دیکە لە تەمویلی مووچەی مانگی شوباتی فەرمانبەرانی هەرێمی کوردستان، خرایە سەر هەژماری بانکیی وەزارەتی دارایی و ئابووری لە لقی هەولێری بانکی ناوەندیی عێراق".

وەزارەتی دارایی ئاماژەی بەوە  دا، "چاوەڕوان دەکەین سبەی دووشەممە، لەگەڵ گەیشتنی تەواوی تەمویلی مووچە لە لایەن وەزارەتی دارایی عێراقەوە، ڕاستەوخۆ دەست بە دابەشکردنی مووچەی مانگی شوبات بکەین".

پێنجشەممە، 5ـی ئاداری 2026، وەزارەتی دارایی و ئابووریی هەرێمی کوردستان رایگەیاندبوو، بڕی 274 ملیار و 962 ملیۆن دینار بە چوار گوژمە، وەک بەشێک لە تەمویلی مووچەی مانگی شوباتی مووچەخۆرانی هەرێمی کوردستان، خرایە سەر هەژماری بانکیی وەزارەتەکەمان لە لقی هەولێری بانکی ناوەندیی عێراق".