یەکێتیی هاوردە و ناردنکاران: دەروازە سنوورییەکانی کوردستان و ئێران دەکرێنەوە
یەکێتیی هاوردە و ناردنکاران رایگەیاند، لە چەند رۆژی داهاتوودا هەموو دەروازە سنوورییەکانی نێوان هەرێمی کوردستان و ئێران دەکرێنەوە.
ئەمڕۆ سێشەممە، 10ـی ئاداری 2026، یەکێتیی هاوردە و ناردنکارانی هەرێمی کوردستان لە راگەیەنراوێکدا رایگەیاند، دوای ئەو گرژی و ئاڵۆزییانەی لە چەند رۆژی رابردوودا لە نێوان کۆماری ئیسلامیی ئێران و وڵاتانی ئەمریکا و ئیسرائیل دروست بوون، دەروازە سنوورییەکانی نێوان هەرێم و ئێران داخران، تەنیا دەروازەی باشماخ بە کراوەیی مابووەوە، بەڵام لە ئێستادا بڕیاری کردنەوەی دەروازە داخراوەکانیش دراوە.
لە راگەیەنراوەکەدا ئاماژەی بەوە کرد، رۆژی 8ی ئاداری 2026، دەروازەی شوشمێ لە تەوێڵە کرایەوە، هەروەها سەرلەئێوارەی 9ی ئاداری 2026، دەروازەی سەیرانبەنیش بەڕووی بازرگانیدا کرایەوە.
یەکێتیی هاوردە و ناردنکاران روونیشی کردەوە، لە ئێستادا لە دەروازەی باشماخەوە رۆژانە 500 بارهەڵگر لە باری ترانزێت و کاڵای ئێرانی دێنە ناوەوە و رێژەکەش لە زیادبووندایە. هاوکات باسی لەوەش کرد، بارەکانی ئێران زۆربەیان لە خواردەمەنی پێکهاتوون، وەک سەوزە، میوە، شیرەمەنی، جۆرەکانی خواردنەوەی غازی، شەربەت، نەستەلە و بسکیت، لەگەڵ چەندین کاڵای تر پێش دروستبوونی گرژییەکان هاوردە دەکران.
لە بەشێکی راگەیەنراوەکەدا هاتووە، چاوەڕوان دەکرێت لە رۆژانی داهاتوودا هەردوو دەروازەی حاجی ئۆمەران و پەروێزخانیش بکرێنەوە و دۆخەکە بە تەواوی ئاسایی ببێتەوە.
هاوکات تەیفوور محەممەد، پەیامنێری کوردستان24 رایگەیاند، هاوکات لەگەڵ هێرشەکانی ئەمریکا و ئیسرائیل بۆ سەر ئێران، بەرپرسانی ئەو وڵاتە لە دەروازەی تەمەرچین - حاجی ئۆمەران، دەروازەکەیان لە رووی بازرگانیی ئاسایی و ترانزێتەوە بە رووی هەرێمی کوردستاندا داخستووە.
بەپێی زانیارییەکانی پەیامنێری کوردستان24، بەرپرسانی ئێران رێکارەکانیان توندتر کردووەتەوە و لە بەردەم هەردوو دەرگای بازرگانیی ئاسایی و ترانزێتدا بەربەستی کۆنکرێتییان داناوە، بەمەش ئاڵوگۆڕی بازرگانی بەتەواوی پەکخراوە.
لەبارەی هاتووچۆی گەشتیارانەوە، پەیامنێرەکەمان ئاماژەی بەوە دا، هاتوچۆ بە توندی سنووردار کراوە؛ لایەنی ئێرانی تەنیا رێگە بەو هاووڵاتییانەی خۆیان دەدەن کە لە هەرێمی کوردستانن بگەڕێنەوە بۆ وڵاتەکەیان، هەروەها ڕێگەش بەو گەشتیارە عێراقی و کوردستانییانە دراوە کە لە ناو خاکی ئێراندان بگەڕێنەوە بۆ هەرێمی کوردستان، واتا رێگە بە چوونی هیچ گەشتیارێکی نوێ نادەن.
دەروازەی نێودەوڵەتیی حاجی ئۆمەران - تەمەرچین، تاکە دەروازەی سنووریی فەرمییە لە سنووری پارێزگای هەولێر و ئیدارەی سەربەخۆی سۆران لەگەڵ ئێران، کە ئێستا بەهۆی ئەم پێشهاتە ئەمنییانەوە جموجووڵ تێیدا گەیشتووەتە ئاستی سفر.