ئێران: شوێنی نیشتەجێبوونی فەرماندە و بەرپرسانی سیاسیی دوژمن دەکەینە ئامانج
گوتەبێژی قەرارگەی خاتەمولئەنبیا رایگەیاند، لەمەودوا شوێنی نیشتەجێبوونی فەرماندە سەربازییەکان و بەرپرسە سیاسییەکانی دوژمن دەکرێنە ئامانجی هێرشەکانیان.
دووشەممە 30ـی ئاداری 2026، ئیبراهیم زولفەقاری گوتەبێژی قەرارگەی خاتەمولئەنبیا، رایگەیاند، بڕیارە وەک وەڵامێک بۆ شەڕانگێزی و کارە تیرۆریستییەکانی دوژمنانی ئەمریکی و سەهیۆنیست بە ئامانجگرتنی ماڵ و حاڵی هاووڵاتیانی مەدەنی لە شارە جیاوازەکانی ئێراندا، بەرپرسانی سیاسی و شوێنی نیشتەجێبوونی دوژمن بکەینە ئامانج.
هەروەها جەختی کردەوە، هێزە چەکدارەکانی ئێران لە کاردانەوەکانیاندا چیتر تەنیا شوێنە سەربازییەکان ناکەنە ئامانج، بەڵکو ناوەندی بڕیار و شوێنی نیشتەجێبوونی سەرکردە سیاسی و سەربازییەکانی لایەنی بەرانبەریش دەبنە ئامانجی راستەوخۆی ئێران.