حەج و عومرە: رێکارەکانی مامەڵەی حاجیانی هەرێمی کوردستان بەردەوامە

گوتەبێژی بەڕێوەبەرایەتیی گشتیی حەج و عومرەی هەرێمی کوردستان رایگەیاند: حکوومەتی هەرێمی کوردستان هەموو ئامادەکارییەک و پاڵپشتیەکی ئێمەی کردووە، بۆ ئەوەی بە باشترین شێوە هاوکاری حاجیانمان بکەین و هەروەها شاندێکی حەج و عومرەی عێراق ئێستا لە وڵاتی سعوودییەن.

کاروان ستوونی، گوتەبێژی بەڕێوەبەرایەتیی گشتیی حەج و عومرەی هەرێمی کوردستان، ئەمڕۆ یەکشەممە، 5ـی نیسانی 2026، بە ماڵپەڕی کوردستان24ـی گوت: رێکارەکانی مامەڵەی حاجیانی هەرێمی کوردستان بەردەوامە و کار لەسەر ئەوە دەکرێت  بەبێ گرفت  لە کاتی خۆیدا بەڕێوەبچێت.

کاروان ستوونی گوتیشی: بەهۆی ئەم بارودۆخە ئەمنییەی هەیە، بەتایبەتی هێرشی گرووپە میلیشیا لە یاسا دەرچووەکان بە ئەگەری زۆرەوە بە پاس هاووڵاتیانی هەرێمی کوردستان گەشتی سعوودیە بکەن بۆ بەجێهێنانی فەریزەی حەج.

گوتەبێژی حەج و عومرە ئاماژەی بەوە دا، حکوومەتی هەرێمی کوردستان هەموو ئامادەکارییەک و پاڵپشتیەکی ئێمەی کردووە، بۆ ئەوەی بە باشترین شێوە هاوکاری حاجیانمان بکەین و هەروەها شاندێکی حەج و عومرەی عێراق ئێستا لە وڵاتی سعوودییەن.

کاروان ستوونی باسی لەوە کرد، پرۆسەی ئەنجامدانی عومرەش بەردەومی هەیە و ژمارەیەک لە عومرەکارانی هەرێمی کوردستان لە وڵاتی سعوودیەن.

ئەمساڵ لە هەرێمی کوردستان پێنج هەزار و 120 کەس  بە مەبەستی بەجێهێنانی فەریزەی حەج دەچنە سعوودیە.