ئیبراهیم رەزایی بۆ کوردستان24: سەردەمی دانبەخۆداگرتنی ئێران کۆتایی هاتووە
گوتەبێژی لیژنەی ئاسایش و سیاسەتی دەرەوەی پەرلەمانی ئێران لە لێدوانێکی تایبەتدا بۆ کوردستان24 هۆشداریی توند دەداتە ئەمریکا و ئیسرائیل و رایدەگەیەنێت، سەردەمی دانبەخۆداگرتنی تاران کۆتایی هاتووە و ئامادەی وەڵامدانەوەی هەر هێرشێکن.
ئیبراهیم رەزایی، گوتەبێژی لیژنەی ئاسایش و سیاسەتی دەرەوەی پەرلەمانی ئێران، ئەمڕۆ دووشەممە، 08ـی حوزەیرانی 2026، لە لێدوانێکی تایبەتدا بۆ ماڵپەڕی کوردستان24 رایگەیاند، ئەمریکا تاوانباری پلە یەکە لەو رووداوانەی لە ناوچەکەدا روو دەدەن و ئیسرائیلیش بەبێ رەزامەندیی واشنتن هیچ هەنگاوێک نانێت.
رەزایی ئاماژەی بەوە کرد، ئەمریکا بە پارەی باج و داهاتی خەڵکەکەی خۆی چەک و فڕۆکە و پێداویستیی سەربازی دەداتە ئیسرائیل بۆ ئەنجامدانی هێرشەکانی. روونیشی کردەوە، ئێران بەردەوام دەبێت لە سزادانی ئیسرائیل لە بەرانبەر ئەو تاوانانەی ئەنجامیان دەدات.
گوتەبێژی لیژنەی ئاسایشی پەرلەمانی ئێران ئەوەشی خستە روو، تاران پاڵپشتی لە ئارامی و ئاگربەست دەکات لە هەموو بەرەکاندا بەتایبەتی لە لوبنان، یەمەن و عێراق. هەروەها گوتی، هێرشکردنە سەر لوبنان وەک هێرشکردنە سەر ئێران وایە و بۆیەش بە توندی وەڵامیان داوەتەوە.
لە بەشێکی دیکەی قسەکانیدا ئیبراهیم رەزایی ئاماژەی بەوە دا، سەردەمی دانبەخۆداگرتن و بێدەنگیی ئێران بەرانبەر کارەکانی ئیسرائیل و ئەمریکا تێپەڕیوە و ئێستا وڵاتەکەی لە پێگەیەکی زۆر بەهێزتردایە.
لە کۆتاییدا رەزایی روونیشی کردەوە "ئێستا ئێمە خۆمان لە ئەوپەڕی بەهێزییەوە دەبینینەوە و بەراورد بە پێشوو بەهێزترین، هەروەها لە جەنگی 40 رۆژەدا فێربووین چۆن ئیسرائیل و ئەمریکا تێکبشکێنین، هەربۆیە دەبێت ئەمریکییەکان و ئیسرائیلییەکان چاوەڕوانی رۆژگارێکی خراپتر و پڕ ئازارتر بن".
ئەم لێدوانەی رەزایی بۆ کوردستان24 لە کاتێکدایە؛ شەوی رابردوو (یەکشەممە، 07ـی حوزەیرانی 2026)، گرژییەکانی نێوان تاران و تەلئەڤیڤ پێیان نایە قۆناغێکی نوێوە؛ سوپای پاسدارانی ئێران چەندان هێرشی مووشەکی کردە سەر ئیسرائیل و بەشێک لە مووشەکەکان لە تەلئەڤیڤی پایتەخت و ناوچەکانی دیکەی ئەو وڵاتە کەوتنەخوارەوە.
سوپای پاسدران هۆکاری هێرشەکانی بۆ "پابەندنەبوونی ئیسرائیل و ئەمریکا بە ئاگربەست و بەردەوامبوونی هێرشەکانی ئیسرائیل بۆ سەر لوبنان و بەتایبەت ناوچەی زاحییەی بەیرووت" گەڕاندەوە.
لە وەڵامی ئەو هێرشە مووشەکییانەدا، هێزی ئاسمانیی ئیسرائیل هێرشی کردە سەر چەندان ئامانجی سەربازیی ئێران لە ناوچەکانی رۆژئاوا و ناوەڕاستی ئەو وڵاتە. هاوکات هێرشی کردە سەر کۆمەڵگەی پترۆکیمیایی لە ماهشەهر.
سوپای ئیسرائیل لە راگەیەنراوێکدا جەختی کردووە، لە رووی هێرشکردن و بەرگرییەوە بە تەواوەتی ئامادەن و چاودێریی هەموو جموجووڵەکانی ئێران دەکەن. هاوکات، بە گوێرەی میدیاکانی ئەو وڵاتە، ئەم هێرشە پێچەوانانە، چەند رۆژێک دەخایەنن.