نێچیرڤان بارزانی سەرەخۆشی لە حکوومەت و گەلی سووریا دەکات
سەرۆکی هەرێمی کوردستان، بەهۆی رووداوێکی هاتووچۆ لە سووریا کە بووە هۆی گیانلەدەستدان و برینداربوونی 65 کەس، لە پەیامێکدا سەرەخۆشیی خۆی ئاراستەی گەل و حکوومەتی سووریا کرد.
ئەمڕۆ شەممە، 25ـی تەممووزی 2026، نێچیرڤان بارزانی، سەرۆکی هەرێمی کوردستان، لە هەژماری فەرمیی خۆی لە تۆڕی کۆمەڵایەتیی (ئێکس)، پەیامێکی بڵاوکردەوە و تێیدا هاوخەمی و سەرەخۆشیی خۆی بۆ گەل و حکوومەتی سووریا دەربڕی، بەهۆی گیانلەدەستدانی ژمارەیەک هاووڵاتی و کارمەندی وەزارەتی ناوخۆی سووریا لە رووداوێکی هاتووچۆدا.
لە پەیامەکەیدا، سەرۆکی هەرێمی کوردستان رایگەیاندووە: "بە خەم و پەژارەیەکی قووڵەوە هەواڵی رووداوە دڵتەزێنەکەی هاتوچۆمان لە سووریا پێگەیشت، کە بووە هۆی گیانلەدەستدانی ژمارەیەک هاووڵاتی کە زۆربەیان لە کارمەندانی وەزارەتی ناوخۆ بوون."
نێچیرڤان بارزانی هاوخەمیی خۆی بۆ بنەماڵەی قوربانیان دەربڕیوە و نووسیویەتی: "لێرەوە سەرەخۆشی و هاوخەمیی قووڵی خۆمان ئاڕاستەی بنەماڵە، کەسوکاری قوربانییان و حکوومەتی سووریا دەکەین."
دەشڵێت: لە خوای گەورە داواکارین کۆچکردووان بە بەزەیی و رەحمەتی فراوانی خۆی شاد بکات و جێگەیان بەهەشتی بەرین بێت، هیوای چاکبوونەوەی خێراش بۆ سەرجەم بریندارەکان دەخوازین.
تلقينا ببالغ الحزن والأسى نبأ الحادث المروري الأليم الذي وقع في الجمهورية العربيةالسورية والذي أودى بحياة عدد من المواطنين معظمهم من منتسبي وزارة الداخلية.
— Nechirvan Barzani (@IKRPresident) July 25, 2026
وإننا إذ نُعرب عن خالص تعازينا ومواساتنا لعوائل وذوي الضحايا وللحكومة السورية، نسأل الله عز وجل أن يتغمدهم بواسع رحمته…
ئەمڕۆ، لە ئەنجامی پێکدادانی دوو پاس لەسەر رێگای دێرەزوور – دیمەشق، 35 کەس گیانیان لەدەستدا و 30 کەسی دیکەش برینداربوون.
وەزارەتی ناوخۆی سووریا لە روونکردنەوەیەکدا ئاماژەی بەوە دابوو، رووداوەکە لە نێوان پاسێکی گواستنەوەی ئەندامانی هێزەکانی ئاسایشی ناوخۆ و پاسێکی مەدەنیدا بووە، قوربانی و برینداری زۆری لێکەوتووەتەوە، وەزارەتەکە هاوخەمی خۆی بۆ ئەو رووداوە مەرگهێنەرە دەربڕی.
رێگای "دێرەزوور - دیمەشق" لە ناوخۆی وڵاتدا بە رێگای مەرگ ناسراوە، ئەمەش بەهۆی زۆریی رووداوەکانی هاتوچۆ لە ساڵانی رابردوودا؛ چونکە رێگاکە تەسکە و تەنیا یەک سایدی چوون و هاتنی هەیە بێ ئەوەی هیچ بەربەستێک لە نێوانیاندا هەبێت، جگە لە بوونی چاڵ و درز و داڕمانی ژێرخانی رێگاکە.